ఓ ఆడపిల్ల... ఒక మగపిల్లాడు

చాన్నాళ్ళుగా
నేను వాళ్ళనే గమనిస్తున్నాను
ఆ ఇంట్లో ఓ మగపిల్లాడు
ఓ ఆడపిల్ల...
వాడెప్పుడు బయటకెళ్ళినా
తిరిగి ఇంటికొచ్చేదెప్పుడో?!
ఆ పిల్లమాత్రం
ఎలా వెళ్తుందో అలా వచ్చేస్తుంది
ఒంచిన తల ఎత్తకుండా...
వాడికి తలబిరుసుకానీ-
ఆమెకి తనెలాగుండాలో తెలుసు
ఆ ఇంట్లో...
పదిహేనేళ్ళు రాకుండానే
ఆడపిల్ల పెద్దమనిషయ్యింది
ఆర్థిక ఇబ్బందుల్లో ఉన్న
ఇంటికి మరో ఐదేళ్ళకే
పెద్ద దిక్కయ్యింది...
పాతికేళ్ళు దాటిపోతున్నా
ఆ మగపిల్లాడు మాత్రం
పెద్దమనిషవ్వలేదు...
ఎప్పటికవుతాడో గ్యారెంటీ లేదు...