పునర్జన్మిద్దాం

పేరాశల పేర్చుబడిలో
ఆశల భవంతుల్నెంతకాలం
నిర్మించుకుంటూ జీవిద్దాం

అబద్దాల బడుద్దాయలమని
మనల్ని మనమే ఎంత దూరం
చాటుకుంటూ గడిపేద్దాం

రేపటికి కనీసపు మంచివారమని
ఆనవాళ్లనయనా మిగుల్చుకుందామా
నేటిని నేటి దినంలోనే
దినవారాలు గావించుకుందామా...

పునర్జన్మించడం నేర్చుకుందాం
అబద్ధాత్మ సాక్ష్యాల్ని వమ్ముచేసి
మనీ+షిలా బ్రతుకడం మానుకొని
అక్రమ దారుల్నించి తప్పించుకొని
విష సంస్కృతుల చెరవిడిపించుకొని
నవ నాగరికమంటూ భ్రమించడం మాని
అనాగరికం గోతుల్ని పూడ్చుకొని
పునీతుల మవుదాం

అప్పుడయనా మార్పు దిశ కనిపిస్తుందా
మనకై మనం
దిశా నిర్దేశం చేసుకుందాం
పునరావిర్భావ నొప్పులకు ఉపశమనానికి
లేపనం తయారు చేసుకొని రాసుకుందాం
నవ నిర్మాణ
నూతన చరిత లిఖించుకుందాం.