ఉడుపి (కర్ణాటక), ఆగస్టు 18: కర్ణాటకలో విశ్వహిందూ పరిషత్ (విహెచ్‌పి), బజరంగ్ దళ్‌కు చెందిన గోసంరక్షకులు జరిపిన దాడిలో ఒక బిజెపి కార్యకర్త మృతి చెందాడు. మరో వ్యక్తి తీవ్రంగా గాయపడ్డాడు. ఉడుపి జిల్లాలోని హెబ్రి సమీపంలో బుధవారం రాత్రి విహెచ్‌పి, బజరంగ్ దళ్ కార్యకర్తలు దారికాచి ఈ దాడికి తెగబడ్డారు.

న్యూఢిల్లి:రాజధాని న్యూఢిల్లీలోని దీన్‌దయాళ్ ఉపాధ్యాయ్ మార్గ్‌లో 2 ఎకరాల సువిశాల స్థలంలో నిర్మించ తలపెట్టిన బిజెపి నూతన కార్యాలయం పనులకు గురువారం ఉదయం శంకుస్థాపన చేశారు. 70 గదులతో అత్యంత ఆధునికంగా దీనిని నిర్మించనున్నారు. పార్టీకోసం ప్రాణత్యాగం చేసినవారికి ఈ భవనాన్ని అంకితం చేయనున్నారు. శంకుస్థాపన కార్యక్రమంలో ప్రధాని మోదీ, బిజెపి జాతీయ అధ్యక్షుడు అమిత్‌షా హాజరయ్యారు.

బెంగళూరు:కాశ్మీర్‌లో పరిస్థితులపై అమ్నెస్టి సంస్థ నిర్వహించిన చర్చా కార్యక్రమంలో భారత్ వ్యతిరేక నినాదాలు విన్పించిన సంఘటనపై కర్నాటక, గోవాల్లోని అమ్నెస్టి ఇంటర్నేషనల్ సంస్థ కార్యాలయాలను మూసివేశారు. కాగా దేశ వ్యతిరేక నినాదాలు చేసిన ఆ కార్యక్రమం దేశ ద్రోహమని బిజెపి విద్యార్థి విభాగం ఏబివిపి ఆగ్రహం వ్యక్తం చేసింది. కాగా దీనిపై స్పందించిన రాష్ట్ర ప్రభుత్వం దేశద్రోహం కేసు నమోదు చేసింది.

న్యూఢిల్లి:కాంగ్రెస్ అధ్యక్షురాలు సోనియాగాంధీ న్యూఢిల్లీలోని శ్రీ గంగారాం ఆస్పత్రిలో మళ్లీ చేరారు. ఆగస్టు 3న వారణాసిలో రోడ్‌షోలో పాల్గొన్న ఆమె తీవ్ర అస్వస్థతకు గురైన విషయం తెలిసిందే. కాగా భుజానికి గాయం కావడంతో ఆమెకు శస్తచ్రికిత్స చేశారు. రెండురోజుల కిందట ఆమె డిశ్ఛార్జి అయ్యారు. అయితే కుట్లు విప్పించుకునేందుకు ఆమె మళ్లీ ఆస్పత్రిలో చేరారు. రెండుమూడు రోజులపాటు అక్కడే ఉండాల్సి ఉంటుంది.