మన దేశంలో చాలా అన్యాయాలు జరుగుతున్నాయట.. ఈ విషయమై అమెరికా ప్రభుత్వం ఒక నివేదికను మన ప్రభుత్వానికి పంపించింది. ఇతర దేశాల నుంచి డబ్బు అందుకుంటున్న ‘సేవా’ సంస్థలను మన ప్రభుత్వం క్షోభ పెడుతోందట! ( అంటే మత మార్పిడి సంస్థలను అని అర్థం) మతాలూ, కులాలూ, ఆడవాళ్లూ వగైరా అందరి పట్లా మానవ హక్కులకు వ్యతిరేకంగా మన ప్రభుత్వం ప్రవర్తిస్తోందట. కనుక తన పద్ధతి మార్చుకోవాలట.

దేశ శ్రేయస్సు కోసం ప్రస్తుతం ఏకాత్మ మానవ దర్శన సిద్ధాంతం అనుసరణీయం. కుల, మత, వర్గ, ప్రాంత, భాషా విభేదాలు దాటి జాతికోసం పనిచేసే మనుషుల నిర్మాణం, నేటి అవసరం, వ్యక్తి నిర్మాణం వల్లనే దేశాభివృద్ధి సాధ్యపడుతుంది. ‘కలసి వుంటే కలదు సుఖం’ అన్న భావనయే ఏకాత్మ మానవతావాదం.

ఇటీవల ఉభయ తెలుగు రాష్ట్రాల్లో గ్రూప్-2 పరీక్షల సందర్భంగా అభ్యర్థులకు నానా ఇబ్బందులు ఎదురయ్యాయి. కొన్ని సెంటర్లలో చిన్న పిల్లలకు వేసే బెంచీలనే అభ్యర్థులకు వేయడం గమనార్హం. రోజుకు 5, 6 గంటలు ఆ చిన్న బెంచీలపై కూర్చోలేక అభ్యర్థులు నరకయాతనని అనుభవించారు. మహిళా అభ్యర్థుల వెంట వచ్చిన వారికి పరీక్షా కేంద్రాల వద్ద పడిగాపులు తప్పలేదు.

అవినీతిపరులైన అధికారులను, ఉద్యోగులను ఎసిబి యంత్రాంగం పట్టుకోని రోజు ఉండదంటే అతిశయోక్తి కాదు. దీనికి సంబంధించి రోజూ మనం మీడియాలో వార్తలు చూస్తున్నాం. వేలాదిమంది లంచగొండుల్లో ఒక్కరో ఇద్దరో దొరుకుతారు, అదీ బాధితులు ఇచ్చే సమాచారం మేరకు ఎసిబి అధికారులు ‘వల’ పన్ని పట్టుకుంటారు. లంచగొండి అధికారులు, ఉద్యోగులు జనం నుంచి వసూలు చేసిన మొత్తాన్ని తామే తీసుకుంటున్నా- ఇతరులకు ఇందులో వాటా ఉందని చెబుతుంటారు.