న్యూఢిల్లీ, మార్చి 22: ఇటీవలి సార్క్ సమావేశాల్లో ప్రపంచ మహమ్మారిగా మారిన కరోనా నియంత్రణకు సభ్య దేశాలు సహకరించాలని ప్రధాన మంత్రి నరేంద్ర మోదీ పిలుపునిచ్చిన సందర్భంగా సార్క్ విపత్తుల నిర్వహణా కేంద్రం ఆదివారం కరోనా వైరస్ సమాచారాన్ని ఎప్పటికప్పుడు తెలియజేసే విధంగా వెబ్‌సైట్‌ను ప్రారంభించింది.

ముంబయి, మార్చి 22: దేశ వాణిజ్య రాజధాని ముంబయి ఆదివారం ఏడారిని తలపించింది. కరోనా వ్యాప్తిని అరికట్టేందుకు దేశ వ్యాప్తంగా ఆదివారం ‘జనతా కర్ఫ్యూ’ పాటించాలని ప్రధాన మంత్రి మోదీ ఇచ్చిన పిలుపునకు ముంబయి ప్రజలు అనూహ్యంగా స్పందించారు. జనతా కర్ఫ్యూను విజయవంతం చేశారు. ఎప్పుడు జనసమ్మర్ధంతో ఉండే ముంబయిలోని అనేక ప్రాంతాలు ప్రజల సందడి లేక నిశ్శబ్దం రాజ్యమేలింది.

వాషింగ్టన్: చైనా కరోనా వైరస్ విషయంలో చాలా గోప్యంగా వ్యవహరించిందని, ఈ సమాచారాన్ని సకాలంలో ప్రపంచ దేశాలతో పంచుకోలేదని అమెరికా అధ్యక్షుడు డొనాల్డ్ ట్రంప్ విమర్శించారు. ఒకవేళ చైనా కరోనా వైరస్ గురించి ముందే హెచ్చరించి ఉంటే, అమెరికా, ప్రపంచం ఈ మహమ్మారిని ఎదుర్కొనేందుకు ఇంకా బాగా సిద్ధమయి ఉండేవని ఆయన పేర్కొన్నారు.

న్యూఢిల్లీ: కరోనా వైరస్ (కోవిడ్-19) సోకిన రోగులకు చికిత్స చేసేందుకు అన్ని రాష్ట్రాలూ నిర్ధిష్ట సంఖ్యలో ప్రత్యేకంగా ఆసుపత్రులను కేటాయించనున్నాయని కేంద్ర ఆరోగ్య మంత్రిత్వ శాఖ ప్రకటించింది. ప్రధాని నరేంద్ర మోదీ పిలుపు మేరకు ఆదివారం దేశ ప్రజలు పెద్ద ఎత్తున జనతా కర్ఫ్యూలో పాల్గొన్నారని ఇండియన్ కౌన్సిల్ ఆఫ్ మెడికల్ రిసెర్చ్ (ఐసీఎంఆర్) డైరెక్టర్ బలరాం భార్గవ ఆదివారం విలేఖరుల సమావేశంలో తెలిపారు.