దిల్లీ: భద్రతా వ్యవస్థను ఛేదించి పార్లమెంటులోకి వెళ్లడంపై ఓ వీడియో తీసి సామాజిక మీడియాలో పోస్టు చేసిన ఆమ్‌ఆద్మీ పార్టీ ఎంపి భగవంత్ మాన్ వ్యవహారంపై శుక్రవారం పార్లమెంటు ఉభయసభల్లో కాంగ్రెస్, బిజెపి సభ్యులు ఆగ్రహం వ్యక్తం చేశారు. తన ఎదుట వెంటనే హాజరు కావాలని లోక్‌సభ స్పీకర్ సుమిత్రా మహాజన్ భగవంత్ మాన్‌కు సమన్లు జారీ చేశారు. దీంతో ఆయన స్పీకర్ ఎదుట హాజరై సుమారు 20 నిమిషాలపాటు వివరణ ఇచ్చారు.

హైదరాబాద్: కబాలి సినిమా మొదటి రోజు మొదటి షో చూడాలనుకొనేవారికి థియేటర్ల లో హౌస్‌ఫుల్ బోర్డులే దర్శనమిస్తున్నాయి. రంగారెడ్డి జిల్లా శంషాబాద్ గణేష్ థియేటర్‌లో బ్లాక్‌లో టికెట్లు అమ్ముతున్నారు. అభిమానులు బ్లాక్ టికెట్ల వ్యవహారంపై ఎస్‌వోటీ పోలీసులకు సమాచారం అందించారు. దీంతో రంగంలోకి దిగిన పోలీసులు నలుగురిని అదుపులోకి తీసుకున్నారు.

మహబూబ్‌నగర్: మక్తల్ మండలం భూత్పూర్ నుంచి జలసాధన సమితి మహా పాదయాత్ర శుక్రవారం ప్రారంభమైంది. కొడంగల్-నారాయణపేట ఎత్తిపోతల పథకాన్ని ప్రభుత్వం తక్షణమే చేపట్టాలంటూ పాదయాత్రను చేపట్టారు. కాంగ్రెస్ నేతలు జైపాల్‌రెడ్డి, దామోదర్‌రెడ్డి, బీజేపీ నేత మురళీధర్‌రావు, సీపీఐ నేత గుండా మల్లేష్, టీడీపీ నేతలు, రావుల, బక్కని, ప్రజాసంఘాల నేతలు పాల్గొన్నారు.

హైదరాబాద్: హైదర్‌గూడ‌లో అదృశ్యమైన చిన్నారులు మాధవి, వైష్ణవిలను శుక్రవారం పోలీసులు తల్లిదండ్రులకు అప్పగించారు. రెండు రోజుల క్రితం ఇద్దరు చిన్నారులు అదృశ్యమయ్యారు. కుటుంబసభ్యుల ఫిర్యాదుతో పోలీసులు దర్యాప్తు చేపట్టారు. తల్లి కొట్టడం వల్లే మాధవి తాతగారింటికి పారిపోయిందని, తానూ వస్తానని చెప్పడంతో వైష్ణవిని తీసుకెళ్లిందని పోలీసులు తెలిపారు.