ముంబై, మార్చి 5: భారత రిజర్వు బ్యాంక్ గవర్నర్ ఉర్జిత్ పటేల్‌ను ఉద్యోగానికి రాజీనామా చేయాలంటూ బెదిరింపు ఫోన్ కాల్ వచ్చింది. రాజీనామా చేయకపోతే పటేల్, ఆయన కుటుంబానికి హాని చేస్తామంటూ ఓ యువకుడు ఈ-మెయిల్ ద్వారా బెదిరించాడు. ఫిబ్రవరి 23న తనకు మెయిల్ వచ్చినట్లు పటేల్ పోలీసులకు ఫిర్యాదు చేశారు. ముంబై పోలీస్ సైబర్ సెల్ ఈ మేరకు ఫిర్యాదు నమోదు చేసుకుని విచారణ జరిపింది.

సోనేభద్ర, మార్చి 5: రైతుల రుణాలను మాఫీ చేశామంటూ కేంద్రంలోని ఎన్డీయే సర్కార్ చెప్పుకోవడంపై కాంగ్రెస్ ఉపాధ్యక్షుడు రాహుల్ గాంధీ తీవ్రస్వరంతో ధ్వజమెత్తారు. దేశంలో 50 మంది సంపన్నులకు సంబంధించిన 1.40 లక్షల కోట్ల రుణాలను మాత్రమే మోదీ సర్కారు మాఫీ చేసిందని, 50వేల కోట్ల రూపాయలున్న పేద రైతుల రుణాలను మాఫీ చేసేందుకు నిరాకరించిందని ఆదివారం నాడిక్కడ జరిగిన ఓ ఎన్నికల ర్యాలీలో రాహుల్ అన్నారు.

న్యూఢిల్లీ, మార్చి 5: కేంద్ర ప్రభుత్వం ఈ నెల చివర్లో దాదాపు 50 లక్షల కేంద్ర ప్రభుత్వ ఉద్యోగులకు, అలాగే 58 లక్షల పింఛనుదారులకు 2 శాతం కరవుభత్యం పెంపును ప్రకటించే అవకాశం ఉంది. ఉద్యోగులు, పింఛనుదారుల ఆదాయాలపై ద్రవ్యోల్బణం ప్రభావాన్ని తగ్గించడం కోసం ప్రభుత్వం కరవుభత్యాన్ని ఇస్తుంది.

భద్రాచలం, మార్చి 4: ఛత్తీస్‌గఢ్ రాష్ట్రంలోని బస్తర్ దండకారణ్య ప్రాంతం మావోయిస్టులకు కంచుకోట. అయితే రెండేళ్లుగా మావోయిస్టుల దూకుడుకు పోలీసులు చెక్ పెట్టారు. 2016 సంవత్సరంలో జరిగిన ఎన్‌కౌంటర్లలోనైతే ఏకంగా 120 మందికి పైగా మావోయిస్టులు, వారి సానుభూతిపరులు చనిపోయారు. ఇది ఛత్తీస్‌గఢ్ రాష్ట్ర చరిత్రలోనే రికార్డు. కాగా గడిచిన రెండు నెలలుగా పోలీసుల దూకుడుకు అడ్డుకట్ట పడింది.