గుంటూరు: అనేక సమస్యల నేపథ్యంలో ఏర్పడిన ఎపికి కేంద్ర ప్రభుత్వం నుంచి ఆశించిన సహకారం అందడం లేదని సిఎం చంద్రబాబు ఒకింత ఆవేదన వ్యక్తం చేశారు. గుంటూరు జిల్లా పర్యటన సందర్భంగా పిడుగురాళ్ల మండలం బ్రాహ్మణపల్లిలో నీరు-చెట్టు కార్యక్రమంలో ఆయన మాట్లాడారు. ప్రస్తుతం కరవు సమస్య వెంటాడుతున్నా ధైర్యంగా ముందుకు వెళ్తున్నామన్నారు.

దిల్లీ: ఏ రాష్ట్రానికీ ప్రత్యేకహోదా ఇవ్వాలని 14వ ఆర్థిక సంఘం సూచించలేదని, రెవెన్యూలోటును భర్తీ చేయాలని చెప్పినందున ఆంధ్రప్రదేశ్‌కు ఇక ప్రత్యేకహోదా అవసరం లేదని కేంద్ర హోంశాఖ సహాయ మంత్రి హెచ్‌పి చౌదరి శుక్రవారం ఇక్కడ మీడియా సమావేశంలో తేల్చిచెప్పారు. ఎపికి పన్ను రాయితీలు, ప్రత్యేక కేటాయింపులు ఇస్తున్నామన్నారు.

దిల్లీ: విభజన చట్టంలో ఇచ్చిన హామీలను దశలవారీగా అమలు చేస్తూ ఎపికి నిధుల్ని కేటాయిస్తున్నట్లు కేంద్రమంత్రి హెచ్‌పి చౌదరి శుక్రవారం ఇక్కడ మీడియాకు తెలిపారు. గత రెండేళ్లలో ఎపి రాజధాని అమరావతి నిర్మాణానికి 2,050 కోట్లు, వెనుకబడిన జిల్లాలకు 750 కోట్లు ఇచ్చామన్నారు. ఎపిలో మూడు ఎయిర్‌పోర్టుల విస్తరణకు చురుగ్గా భూసేకరణ జరుగుతోందన్నారు.

దిల్లీ: రాష్ట్ర విభజన సమయంలో అలనాడు కాంగ్రెస్ నేతలు అనాలోచితంగా వ్యవహరించినందునే నేడు ఎపి ప్రజలు నానాకష్టాలు పడుతున్నారని టిడిపి ఎంపి సిఎం రమేష్ శుక్రవారం రాజ్యసభలో ఆవేదన వ్యక్తం చేశారు. ఎపికి ప్రత్యేక హోదా కోసం ఓ ప్రైవేటు మెంబర్ బిల్లుపై ఆయన మాట్లాడుతూ, విభజన చట్టంలో ఎన్నో లోపాలున్నందున వాటిని సవరించాలన్నారు. తగినన్ని నిధులిచ్చి ఎపిని ఆదుకోవాల్సిన బాధ్యత కేంద్రంపై ఉందన్నారు.