యర్రగొండపాలెం, డిసెంబర్ 6: పంటల కోసం చేసిన అప్పులు తీర్చలేక ఓ రైతు పురుగుమందు తాగి ఆత్మహత్యకు పాల్పడిన సంఘటన గురువారం మండలంలోని గుర్రపుసాల గ్రామంలో జరిగింది. వివరాల మేరకు గ్రామానికి చెందిన గాగర్లమూడి యోగేశ్వరరావు (32) తనకు ఉన్న ఐదు ఎకరాల భూమిలో రెండు ఎకరాలు బత్తాయి, రెండు ఎకరాలు మిరప, ఒక ఎకరాలో బొప్పాయి సాగు చేశాడు. నీరు లేకపోవడంతో పంటలు ఎండిపోయి అప్పులు తీర్చే దారిలేక ఆత్మహత్యకు పాల్పడ్డాడు.

కరీంనగర్ రూరల్, డిసెంబర్ 5: కొత్తపల్లి పోలీసు స్టేషన్ పరిధిలోని రేకుర్తి విజయపురి కాలనీకి చెందిన బోయిని అంజయ్య (38) అనే వ్యక్తి చెట్టుకు ఉరి వేసుకొని రెండు రోజుల క్రితం మృతి చెందినట్లు కొత్తపల్లి ఎస్సై స్వరూప్‌రాజ్ బుధవారం తెలిపారు. గత కొన్ని సంవత్సరాలుగా అనారోగ్యం, ఆర్థిక ఇబ్బందులతో మనసికంగా ఇబ్బంది పడేవాడని తెలిపారు.

న్యూఢిల్లీ, డిసెంబర్ 5: అగస్టావెస్ట్‌లాండ్ వీవీఐపీ హెలీకాప్టర్ కొనుగోలులో మధ్యవర్తిగా వ్యవహరించిన క్రిస్టియన్ మైఖేల్‌కు సీబీఐ ప్రత్యేక కోర్టు ఐదు రోజుల కస్టడీ విధించింది. దుబాయి నుంచి మైఖేల్‌ను మంగళవారం రాత్రి ఢిల్లీకి తీసుకొచ్చారు. బుధవారం ఆయనను సీబీఐ కోర్టులో హాజరుపరిచారు. క్రిస్టియన్ మైఖేల్‌కు బెయిల్ కోసం పాటియాలా కోర్టులో ఆయన న్యాయవాది పిటిషన్ వేశారు.

కొండమల్లేపల్లి, డిసెంబర్ 5: నాగార్జునసాగర్ - హైద్రాబాద్ రహదారిపై నల్లగొండ జిల్లా కొండమల్లేపల్లి మండలం కేశ్యతండా వద్ద బుధవారం జరిగిన రోడ్డు ప్రమాదంలో ముగ్గురు మృతి చెందారు. పోగు సురేందర్‌రెడ్డి (60), పోగు యాదమ్మ (50) అనే భార్యా భర్తలతో పాటు వారి అల్లుడు తిప్పని వెంకట్‌రెడ్డి (35) మృతిచెందగా మరో ఇద్దరు వ్యక్తులు తీవ్రంగా గాయపడ్డారు. ఈ సంఘటనకు సంబంధించిన వివరాలిలా ఉన్నాయి.