ఇప్పటికే డబుల్ హ్యాట్రిక్ విజయాన్ని అందుకున్న నాని, మరో హ్యాట్రిక్ కోసం సన్నాహాలు గట్టిగానే చేస్తున్నాడు. ప్రస్తుతం ‘ఎంసిఏ’ (మిడిల్ క్లాస్ అబ్బాయి) చిత్రంలో నటిస్తున్న నాని, దాంతోపాటు మేర్లపాక గాంధి దర్శకత్వంలో ‘కృష్ణార్జునయుద్ధం’ చిత్రంలో కూడా నటిస్తున్నాడు. ఇప్పటికే ఓ షెడ్యూల్‌ను పూర్తిచేసుకున్న ఈ సినిమా తరువాత తన నెక్స్ట్ చిత్రానికి కూడా ఓకె చెప్పాడట.

టాలీవుడ్‌లో శేఖర్ కమ్ముల అంటే ప్రత్యేకమైన గుర్తింపు వుంది. ఆయన సినిమాలు చాలా క్లాస్‌గా ఉంటూనే మాస్‌ని ఆకట్టుకుంటాయి. లేటెస్టుగా వరుణ్‌తేజ్, సాయిపల్లవితో చేసిన ఫిదా నిజంగా అందర్నీ ఫిదా చేసింది. ఈ సినిమా తరువాత శేఖర్ కమ్ముల తదుపరి చిత్రం ఎవరితో ఉంటుందన్న సందేహాలు ఎక్కువయ్యాయి. ఈ విషయం గురించి శేఖర్ అడిగితే, ఇప్పుడే తదుపరి సినిమా గురించి ఆలోచించడం లేదు అని చెప్పాడు.

పవర్‌స్టార్ పవన్ కళ్యాణ్ - త్రివిక్రమ్ శ్రీనివాస్‌ల చిత్రం శరవేగంగా షూటింగ్ జరుపుకుంటోంది. కొద్దిరోజుల క్రితమే కేరళలోని చిక్‌మంగుళూరులో షెడ్యూల్ ప్రారంభించిన టీమ్ సుమారు మూడు రోజులపాటు షూటింగ్ జరిపి తాజాగా ముగించింది. దీంతో పవన్‌కళ్యాణ్ రాజకీయపరమైన పనుల్ని చక్కబెట్టుకునేందుకు హైదరాబాద్ బయలుదేరారు. ఇకపోతే త్వరలోనే టీమ్ యూరప్ వెళ్లనుందట.

కథాబలం వున్న చిత్రాలకు, వెండితెరపై భారీతనం కురిపించిన సినిమాలకు, స్టార్ వాల్యూ, మేకింగ్ వాల్యూల అరుదైన కలయికకు కేరాఫ్ అడ్రస్ వైజయంతీ మూవీస్ సంస్థ. ఈ బ్యానర్ నుంచి వచ్చిన చిత్రాలెన్నో తెలుగువారి హృదయాల్ని గెలుచుకుని మరపురాని జ్ఞాపకాలుగా మిగిలిపోయాయి. ఇప్పుడు వైజయంతీ మళ్లీ పునఃవైభవం సాధించే దిశగా అడుగులేస్తోంది. వరుసగా సినిమాల్ని తెరకెక్కించే పనిలో నిమగ్నమైంది.