హైదరాబాద్, అక్టోబర్ 5: జిల్లాల పునర్వ్యవస్థీకరణలో భాగంగా తెలంగాణలో పోలీస్ శాఖ కూడా పునర్వ్యవస్థీకరణ కావాలని ముఖ్యమంత్రి కె చంద్రశేఖర్‌రావు అన్నారు. కొత్తగా వచ్చే జిల్లాలు, డివిజన్లు, మండలాల ఆధారంగా పోలీస్ శాఖ కూడా తమ కార్యాలయాలను దసరా రోజునే ప్రారంభించాలని ముఖ్యమంత్రి ఆదేశించారు. ముఖ్యమంత్రి తన క్యాంపు కార్యాలయంలో బుధవారం సమీక్ష నిర్వహించారు.

హైదరాబాద్, అక్టోబర్ 5: జిల్లాల పునర్ విభజన వల్ల మూడు ప్రయోజనాలు ఉన్నాయని మంత్రి కె తారకరామారావు అన్నారు. ఒకటి ప్రజలకు పరిపాలనా సౌలభ్యం, రెండు ద్వితీయ శ్రేణి నాయకత్వం ఎదుగుదల, మూడు ఆధిపత్యానికి చెక్ అని మంత్రి అభిప్రాయపడ్డారు. సిరిసిల్ల జిల్లా ఏర్పాటు చేయాలని కోరుతూ హైపవర్ కమిటీ చైర్మన్ కె కేశవరావును కలిసి మంత్రి కెటిఆర్ వినతిపత్రం సమర్పించారు.

హైదరాబాద్, అక్టోబర్ 5: తెలంగాణలో బిజెపి బలోపేతానికి అనుసరించాల్సిన వ్యూహంపై చర్చించేందుకు ఆ పార్టీ రాష్ట్ర కార్యవర్గం ఈ నెల 6, 7 తేదీల్లో సమావేశం కానుంది. మహబూబ్ నగర్ జిల్లాలోని అన్నపూర్ణ గార్డెన్స్‌లో జరిగే ఈ సమావేశాలకు కేంద్ర హోం శాఖ సహాయ మంత్రి హన్సరాజ్ హయర్ ముఖ్యఅతిథిగా హాజరుకానున్నారు. రాబోయే ఎన్నికల్లో పార్టీ అధికారంలోకి రావడమే లక్ష్యంగా ఈ సమావేశాల్లో కార్యాచరణ రూపొందించనున్నారు.

హైదరాబాద్, అక్టోబర్ 5: డ్రగ్స్ కేసులో మరో నిందితుడిగా ఎయిర్‌ఫోర్స్ వింగ్ కమాండర్ రాజశేఖర్‌రెడ్డిని ఎన్‌సిబి బుధవారం అదుపులోకి తీసుకుంది. హైదరాబాద్ డ్రగ్స్ ముఠాకు సహకరిస్తున్నాడన్న అభియోగాలపై నాందేడ్ వెళ్తుండగా అతన్ని అదుపులోకి తీసుకున్నారు. మంగళవారం డ్రగ్స్ తయారు చేస్తున్నారన్న అభియోగంపై బెంగుళూరు సైంటిస్టు వెంకటరమణ, అతని భార్య సహా రవిశంకర్‌రావును ఎన్‌సిబి అదుపులోకి తీసుకున్న సంగతి తెలిసిందే.