నల్గొండ : ఎన్‌కౌంటర్‌లో హతమైన గ్యాంగ్‌స్టర్‌ నయీం మృతదేహాన్ని చూసేందుకు భారీ సంఖ్యలో ప్రజలు తరలివచ్చారు. అంత్యక్రియల సందర్భంగా ఎలాంటి అవాంఛనీయ సంఘటనలు జరగకుండా పోలీసులు భారీ బందోబస్తు ఏర్పాటుచేశారు.

మెదక్‌ : మల్లన్నసాగర్‌ నిర్వాసితులకు న్యాయం చేయాలని కోరుతూ సంగారెడ్డిలో బుధవారం నిరాహార దీక్ష చేపట్టనున్నట్లు కాంగ్రెస్‌ నేత, మాజీ ఎమ్మెల్యే జగ్గారెడ్డి ప్రకటించారు. గ్రామాలను సందర్శించే నేతలను అడ్డుకోవడం, అరెస్టులు చేయడం, లాఠీ ఝళిపించడం సరికాదన్నారు. పోలీసుల జులుంతో నిర్వాసిత గ్రామాల్లో యుద్ధ వాతావరణం నెలకొందని ఆరోపించారు.

హైదరాబాద్ : కృష్ణా పుష్కరాల కోసం నిర్మించిన ఘాట్లు నాసిరకంగా ఉన్నాయని, పుష్కరాల పేరుతో టీఆర్‌ఎస్‌ నేతలు జేబులు నింపుకొనే ప్రయత్నం చేస్తున్నారని కాంగ్రెస్ నేత డీకే అరుణ ఆరోపించారు. పుష్కరాల్లో రాజకీయాలు చేయడం సరికాదన్నారు. సీఎం అన్ని ప్రాంతాలను సమానంగా చూడాలని తెలిపారు.

నల్గొండ : గ్యాంగ్‌స్టర్‌ నయీం అనుచరులు ఐదుగురుని మంగళవారం పోలీసులు అదుపులోకి తీసుకున్నారు. భువనగిరిలో ఎంపీపీ తోటకూర వెంకటేశ్‌ యాదవ్‌ను, మున్సిపల్‌ కౌన్సిలర్‌ నాజర్‌ను అదుపులోకి తీసుకున్నారు.