తెలుగు చిత్ర పరిశ్రమలో అడుగుపెడుతూనే చక్కటి చిత్రాల్లో సహజ నటన కనబరిచి ప్రేక్షకుల మనసుల్ని కొల్లగొట్టింది బ్యూటీ రెజీనా. అదే ఊపులో ఏడాదికి మూడు, నాలుగు చిత్రాల్లో మెరిసింది. యువతరం కథానాయికలతో జోడీ కట్టి కెరీర్‌లో దూసుకెళ్లింది. అయితే ఈ భామ ఇప్పుడు కాస్త నెమ్మదించింది. రెజీనా నటించిన తాజా చిత్రం ‘నక్షత్రం’ బాక్సాఫీస్ వద్ద చతికిలబడి ఆమెను మరింత కుంగదీసింది. ఈ చిత్రం పరాజయం ఈ భామ కెరీర్‌పై ప్రభావం చూపిందని ఆమె సన్నిహితులు చెబుతున్నారు. ‘నక్షత్రం’పై ఎన్నో ఆశలు పెట్టుకుంది. ఈ చిత్రం విజయం సాధిస్తే తెలుగులో మరిన్ని మంచి అవకాశాలు వస్తాయని ఎంతగానో ఆశించింది. ప్రేక్షకులు ఈ చిత్రాన్ని బాక్సాఫీస్ వద్ద బోల్తా కొట్టించండంతో ఆమె ఆశలు నీరుగారిపోయాయి. అంతేకాకుండా, ఈ ఏడు కేరళ నుంచి కొత్త అమ్మాయిల రాక.. నవతరం తారలపై ప్రేక్షకుల చూపు, పరిశ్రమ ప్రోత్సాహం వుండడంతో వారికే అవకాశాలు వస్తున్నాయి. దాంతో రెజీనా కెరీర్ సందిగ్ధంలో పడిందంటున్నారు. మళ్లీ ఊపు వస్తుందో..లేదో చూడాల్సిందే అంటున్నారు.