వర్షమూ - పిల్లలు
Published Saturday, 7 October 2017వానాకాలం పిల్లలంతా
సంతోషం పండుగవుతారు
మబ్బులు కమ్మినప్పుడల్లా
వర్షం తేనెపట్టు కోసం
ఆకాశం చెట్టు వంక చూస్తారు
ఉరుములు మెరుపులు ఊరిస్తోంటే
చినుకుపూల స్పర్శ కోసం
చిగురాకు దోసిళ్లవుతుంటారు
వర్షంలో తడువచ్చనీ..
ఇంటి పక్క నీటి గుంటల్లో
కాగితప్పడవలేసి ఆడొచ్చనీ...
వాళ్లకు ఊహలు పుట్టుకొస్తాయి
పక్షులు వీపు మీద
మేఘాల్ని అతికించుకుని
స్వేచ్ఛగా తిరుగుతుంటాయి
సీతాకోక చిలుకలు
వర్షం వాసన పసిగట్టి
వలయాలుగా తిరుగుతుంటాయి
పుస్తకాల రెక్కలు తొడుక్కుని
వర్షం కురిసే చోటల్లా తిరగాలని
పిల్లల మనసు పిట్ట
ఫికరు కుర్సీ ఎక్కి అలుగుతుంది
ఎటొచ్చీ మనమే
తడిస్తే జ్వరమొస్తుందని
భయం గుంజకు పశువుల్లా కట్టేసి
పెత్తనం ములుగర్ర తిప్పుతుంటాం
వర్షాకాలమంతా మనింట్లో
పిల్లలుండరు, మనముంటం.
*