ప్రకృతి పులకరింత
Published Saturday, 17 March 2018ఒక కొత్త వేకువ కోసం
కళ్లపూలను విప్పార్చి
ఆశగా
ఎదురుచూస్తున్న వేళ
చెట్లు పచ్చగా పిలుస్తుంటాయి
ఎర్రని లేత చివుళ్ల సందుల్లోంచి
తెల్లని వేపపూత
ముక్కుల్ని పలకరిస్తుంటుంది
మావికొమ్మల మాటు నుండి
మామిడిపిందెలు తొంగిచూస్తూ
నోరూరిస్తుంటాయి
ప్రక్కనున్న మావిచెట్టు పైనుండి
ఉషోదయాన
కోయిలొకటి
షడ్జమస్వరంతో
సుప్రభాతం పలుకుతుంది
ప్రకృతి
వన కాంతితో హొయలొలుకుతూ
ఉగాది రాగాన్ని ఆలపిస్తుంది
అనాదిగా చెబుతున్నట్లు
ఉగాది అంటే
షడ్రుచులు
కొత్త బట్టలు
పంచాంగ శ్రవణాలు మాత్రమేకాదు
ప్రకృతి పులకరింతకు ప్రతీక
నూత్న జీవన సంరంభానికి నాంది!