‘జోడి కట్టిందే నీ కోసం..’ అంటూ వి.వి.వినాయక్ దర్శకత్వంలో వచ్చిన ‘లక్ష్మి’ చిత్రంలో వెంకటేష్ సరసన ఆడిపాడి యువతను తనవైపునకు తిప్పుకున్న అందాల తార నయనతార మరో సారి అతడితోనే జత కట్టబోతోంది. ఇద్దరి కలయికలో వచ్చిన ‘లక్ష్మి’, ‘తులసి’ చిత్రాలు ఈ జంటకు భలే క్రేజ్‌ని తెచ్చిపెట్టాయి. ఈ సినిమాల తర్వాత నయనతారకు తెలుగులో భలే అవకాశాలు వెల్లువలా వచ్చిపడ్డాయి. ఇప్పుడు మారుతి దర్శకత్వంలో ‘బాబు బంగారం’లో వెంకటేష్‌తో చాలా కాలం తర్వాత కనిపించబోతోంది. తెలుగు, తమిళం అంటూ రెండు పడవల ప్రయాణం చేసిన ఈ ముద్దుగుమ్మను ఎన్నో వివాదాలు చుట్టుముట్టాయి. తన వ్యక్తి గత విషయాలపై ఆమె ఎంతో ఆవేదన చెందినా, కెరీర్ విషయంలో మాత్రం ఈమె ఎప్పుడూ వెనకడుగు వేయలేదు. ‘‘టాలీవుడ్‌లో మరో మంచి సినిమా ద్వారా వెంకటేష్‌తో కనిపించబోతున్నందుకు చాలా సంతోషంగా వుంది. ఈ చిత్రం తర్వాత మళ్లీ తెలుగులో బిజీ అవుతానన్న నమ్మకం నాకుంది’’ అంటూ చెప్పుకొచ్చింది నయన. అన్నట్లు ఈ చిత్రం ఆగస్టులో ప్రేక్షకుల ముందుకు సిద్ధమవుతోందిట. అదీ..సంగతీ!!