దిగులు పొరల్లోంచి...
Published Saturday, 22 October 2016గాఢమైన దిగులు పొరల్లోంచి
ఉత్సాహవంతమైన కిరణమొకటి
అలా నడచి వస్తుంది
మెల్లగా మనసుని తడుముతుంది
అసందర్భంగా జారిపోయిన
క్షణాలను వెనకకు తెస్తుంది
అరచేతుల్లో ఆనందాన్ని
మోసుకొస్తుంది
వికసించే విరి ఆవిరి తెమ్మెరలో
ఉక్కిరిబిక్కిరి కానిదే
పుష్పం పరిమళం వెదజల్లదు
నిశ్శబ్దాన్ని ఛేదించే అనుభూతి ధార
ఉద్వేగాల వాగులో ప్రయాణించనిదే
అక్షరానికి ఆయువు అందదు
కాలానికి అతీతంగా
కోసుకుపోయిన గాయాలను
వేగవంతమైన చిర్నవ్వు అతికిస్తుంది
మూసుకుపోయిన అనుబంధాల దారులను
ఆర్ద్రంగా అతికిస్తుంది
బెంగటిల్లిన సమయాలే
అనుభవాలకు వారధులు
ముసురు పట్టిన మేఘాలే
మనసు నిండా కురిసే
ప్రశాంతతకు చిహ్నాలు
లయాత్మక వేదికపై
అన్నీ తాత్కాలిక అలజడుల అమరికలే...
చనిపోయిన క్షణాలను బతికించే
సంజీవనీ మాలికలే...
*