న్యూఢిల్లీ, డిసెంబర్ 3: గుజరాత్ స్టేట్ పెట్రోలియం కార్ప్ (జిఎస్‌పిసి) నికర లాభం ఈ ఆర్థిక సంవత్సరం (2016-17) ప్రథమార్ధం (ఏప్రిల్- సెప్టెంబర్)లో 374.03 కోట్ల రూపాయలుగా నమోదైంది. గత ఆర్థిక సంవత్సరం (2015-16) ప్రథమార్ధంలో ఇది 369.55 కోట్ల రూపాయల నష్టాన్ని చవిచూసింది. చమురు అనే్వషణ వ్యయం తదితరాల రద్దు నేపథ్యంలో నష్టాలపాలైంది. ఇదిలావుంటే గ్యాస్ ట్రేడింగ్ ద్వారా వచ్చే ఆదాయం తగ్గుముఖం పట్టినట్లు సంస్థ తెలిపింది. పోయినసారి 5,181.67 కోట్ల రూపాయల ఆదాయాన్ని అందుకున్న సంస్థ.. ఈసారి 4,395.32 కోట్ల రూపాయల ఆదాయాన్ని మాత్రమే పొందింది. ఈ మేరకు ఓ ప్రకటనలో జిఎస్‌పిసి తెలియజేసింది.