విశాఖ: కోస్తాంధ్ర తీరాన్ని ఆనుకుని పశ్చిమ మధ్య బంగాళాఖాతంలో ఉపరితల ఆవర్తనం స్థిరంగా కొనసాగుతోందని, దీని ప్రభావంతో తెలుగు రాష్ట్రాల్లో అక్కడక్కడ వర్షాలు కురిసే అవకాశం ఉందని వాతావరణ శాఖ సోమవారం ఉదయం ప్రకటించింది. ఉపరితల ఆవర్తనం మరింత బలపడి ఈ నెల 21 నాటికి అల్పపీడనమయ్యే అవకాశం ఉన్నట్టు తెలిపింది.

ఏలూరు: 16వ నెంబర్ జాతీయ రహదారిపై సోమవారం ఉదయం జరిగిన రోడ్డు ప్రమాదంలో ఇంజనీరింగ్ విద్యార్థి మరణించగా, మరొక విద్యార్థి కి గాయాలయ్యాయి. పెదవేగి మండలానికి చెందిన సుమంత్ ఏలూరు ఇంజనీరింగ్ కళాశాలకు బైక్‌పై బయలుదేరాడు. మార్గమధ్యలో మరొక విద్యార్థి సుమన్ బైకు ఎక్కాడు. వీరు బైకుపై వస్తున్న క్రమంలో ఎదురుగా వస్తున్న కారు ఢీకొట్టింది. వీరిని ఆస్పత్రికి తరలించగా సుమంత్ మరణించాడని వైద్యులు తెలిపారు.

విజయవాడ: ప్రత్యేక హోదా ఇచ్చినంత మాత్రాన ఉద్యోగాలు రావని, ఆర్థిక స్థితి మెరుగైతేనే ఉద్యోగాలు వస్తాయని కేంద్రమంత్రి సుజనాచౌదరి సోమవారం విలేకరులతో అన్నారు. ప్యాకేజీకి కేంద్రం త్వరలోనే చట్టబద్ధత కల్పించనున్నట్లు, ప్రత్యేక హోదా వల్ల కలిగే లాభాలు ప్యాకేజీ ద్వారా ఇచ్చేందుకు కేంద్రం ఒప్పుకుందని తెలిపారు.

విజయవాడ: ఆంధ్రప్రదేశ్‌ ముఖ్యమంత్రి చంద్రబాబు నాయుడు పోలవరం ప్రాజెక్టుపై సోమవారం ఉదయం సమీక్ష నిర్వహించారు. విజయవాడలోని కమాండ్‌ కంట్రోల్‌ రూమ్‌ నుంచి ఆధునిక సాంకేతిక విధానం ద్వారా పోలవరం వద్ద క్షేత్రస్థాయిలో జరుగుతున్న పనులను పర్యవేక్షించారు. పోలవరం పనులపై జలవనరుల శాఖ అధికారులు, గుత్తేదారు సంస్థల ప్రతినిధులు ముఖ్యమంత్రికి వివరించారు.