విజయవాడ: గతంలో ఎంపీగా ఉన్నపుడు లోక్‌సభలో నోరుమెదపని వైఎస్ జగన్ ఇపుడు అసెంబ్లీలో ప్రతిపక్ష నేతగా వ్యవహరిస్తూ రాష్ట్ర అభివృద్ధిని అడ్డుకుంటున్నారని ఎపి సమాచార, ఐటీ శాఖల మంత్రి పల్లె రఘునాథరెడ్డి ఆరోపించారు. ఆయన బుధవారం ఇక్కడ మీడియాతో మాట్లాడుతూ, నీచ రాజకీయాలు చేస్తున్న జగన్ ఎపికి నిధులు రాకుండా వ్యవహరిస్తున్నారని ఆయన విమర్శించారు.

హైదరాబాద్:తుని ఘటనకు సంబంధించి తన తప్పులను కప్పిపుచ్చుకునేందుకు వైకాపాపై నిందలు మోపిన ముఖ్యమంత్రి చంద్రబాబు నాయుడి ప్రభుత్వం ఇప్పుడు తమ పార్టీ నేతలు, కార్యకర్తలపై తప్పుడు కేసులు బనాయిస్తోందని ఆ పార్టీ అధినేత వై.ఎస్.జగన్ ఆరోపించారు. బుధవారం గవర్నర్ నరసింహన్‌ను కలసి ఫిర్యాదు చేసిన జగన్ ఆ తరువాత మీడియాతో మాట్లాడారు.

తిరుపతి: ఇక్కడి అన్నారావు జంక్షన్ సమీపంలో ఓ మురుగు కాల్వలో బుధవారం ఉదయం భారీ పేలుడు సంభవించడంతో కలకలం చెలరేగింది. స్థానికులు ఇచ్చిన సమాచారం మేరకు పోలీసులు వెంటనే సంఘటనా స్థలానికి చేరుకొని, గాలింపు చర్యలు చేపట్టగా బాంబు పేలుడుకు సంబంధించి ఎలాంటి ఆనవాళ్లు లభించలేదు. ఎవరైనా బాణాసంచా పేల్చి ఉంటారని అనుమానిస్తున్నారు. బాంబు స్క్వాడ్‌తో సమీప ప్రాంతాలను పోలీసులు క్షుణ్ణంగా గాలించారు.

ఏలూరు: వివిధ స్కీముల పేరిట వేల కోట్ల రూపాయలను ప్రజల నుంచి డిపాజిట్‌గా సేకరించి వంచించిన కేసులో అగ్రిగోల్డ్ చైర్మన్ ఎ.వి.రామారావు, ఎం.డి. శేషు నారాయణరావులను సిఐడి పోలీసులు కస్టడీలోకి తీసుకొని విచారణ నిమిత్తం రహస్య ప్రాంతానికి తీసుకువెళ్లారు. ఈ ఇద్దరు నిందితులను కస్టడీలోకి తీసుకునేందుకు తమకు అనుమతి ఇవ్వాలని పోలీసులు చేసిన విజ్ఞప్తిని న్యాయమూర్తి ఆమోదించారు.