లక్నో: తమ పార్టీ అధినేత్రి మాయావతిపై బిజెపి బహిష్కృత నేత దయాశంకర్ సింగ్ అనుచిత వ్యాఖ్యలు చేసినందుకు నిరసనగా బిఎస్‌పి కార్యకర్తలు యుపిలో గురువారం పెద్దఎత్తున ఆందోళన కార్యక్రమాలు చేపట్టారు. దళిత మహిళను కించపరుస్తూ వ్యాఖ్యలు చేసిన దయాశంకర్‌ను అరెస్టు చేయాలని వారు డిమాండ్ చేశారు. బిఎస్‌పి ఆందోళనల నేపథ్యంలో పలు చోట్ల పోలీసులు భారీగా మోహరించారు.

హైదరాబాద్: ఎపికి ప్రత్యేక హోదా కల్పించాలని కోరుతూ కాంగ్రెస్ ఎంపి కెవిపి రామచంద్రరావు ప్రవేశపెట్టిన ప్రైవేటుబిల్లుకు తమ పార్టీ మద్దతు ఇస్తుందని సిపిఐ నేత నారాయణ స్పష్టం చేశారు. బిల్లుపై చర్చ సందర్భంగా రాజ్యసభలో రేపు జరిగే పరిణామాలకు ప్రధాని మోదీ, చంద్రబాబు బాధ్యత వహించాల్సి ఉంటుందన్నారు. రాజకీయాలకు అతీతంగా చిత్తశుద్ధితో ఈ బిల్లుకు మద్దతు ఇవ్వాలన్నారు.

హైదరాబాద్ : కేపీహెచ్‌బీలోని రోడ్డు నెంబర్ 5 లోని హాస్టల్‌లో గురువారం అగ్నిప్రమాదం సంభవించింది. స్థానికులు అగ్నిమాపక సిబ్బందికి సమాచారం అందించారు.అగ్నిమాపక సిబ్బంది ఘటన స్థలానికి చేరుకుని మంటలార్పుతున్నారు. అగ్నిప్రమాదానికి కారణాలు తెలియరాలేదు. పోలీసులు ఘటన స్థలానికి చేరుకున్నారు.

అంకారా: టర్కీలో మూడు నెలల పాటు అత్యవసర పరిస్థితిని విధిస్తున్నట్లు ఆ దేశాధ్యక్షుడు తయీప్‌ ఎర్డోగాన్‌ ప్రకటించారు. సైనికుల తిరుగుబాటు నేపథ్యంలో జాతీయ భద్రతామండలి, కేబినెట్‌ సమావేశమైన అనంతరం ఈ నిర్ణయం ప్రకటించారు. సైనికుల తిరుగుబాటు వెనుక ఉగ్రవాదుల హస్తం ఉండొచ్చని అధికారులు అనుమానిస్తున్నారు. దీంతో దేశంలో అత్యవసర పరిస్థితిని విధించారు.