అహ్మదాబాద్: గుజరాత్‌లోని కచ్ జిల్లాలో పాకిస్తాన్‌కు చెందిన ఓ చేపల పడవను ఇండియన్ కోస్ట్‌గార్డ్ అధీనంలోకి తీసుకుంది. అరేబియా సముద్ర తీరప్రాంతమైన జఖావువద్ద భారత జలాల్లోకి అక్రమంగా ప్రవేశించిన బోట్‌ను అడ్డుకుని 11 మంది జాలర్లను అరెస్టు చేశారు. ‘పాకిస్తాన్ పడవ భారత జలాల్లోకి ఐదు నాటికల్ మైళ్లు చొచ్చుకొచ్చింది’ అని కోస్ట్‌గార్డ్ కెప్టెన్ అభిషేక్ మటిమన్ చెప్పారు.

న్యూఢిల్లీ: కేంద్ర అమ్మకం పన్ను (సిఎస్‌టి)ను దశలవారీగా ఉపసంహరిస్తున్న కేంద్రం ఇందుకు సంబంధించి దీర్ఘకాలం నుంచి పెండింగ్‌లో ఉంచిన నష్టపరిహారాన్ని త్వరగా విడుదల చేయాలని, నిధులను రానున్న సార్వత్రిక బడ్జెట్‌లో అందించాలని అనేక రాష్ట్రాలు కోరారు. కేంద్ర బడ్జెట్‌కు ముందు శనివారం న్యూఢిల్లీలో ఆర్థిక శాఖ మంత్రి అరుణ్ జైట్లీతో జరిపిన సమావేశంలో ఈమేరకు డిమాండ్ చేశాయి.

న్యూదిల్లి-రాజస్థాన్ కేంద్రీయ విశ్వవిద్యాలయంలో పిహెచ్‌డి చేస్తున్న విద్యార్థి మోహిత్ ఆత్మహత్యకు పాల్పడ్డాడు. హైదరాబాద్ సెంట్రల్ వర్శిటీలో స్కాలర్ రోహిత్ ఆత్మహత్య సంఘటన దేశవ్యాప్తంగా సంచలనం రేపిన సంఘటన మరవకముందే అలాంటి మరో దుర్ఘటన జరగడం గమనార్హం. గైడ్ వేధింపులవల్లే మోహిత్ ఆత్మహత్యకు పాల్పడినట్లు పోలీసులు భావిస్తున్నారు.

దిల్లీ: మరి కొద్దిరోజుల్లో వార్షిక బడ్జెట్‌ను పార్లమెంటులో ప్రవేశపెట్టనున్న నేపథ్యంలో రాష్ట్రాల ఆర్థిక మంత్రులతో కేంద్ర ఆర్థిక మంత్రి అరుణ్ జైట్లీ ఈ రోజు సమావేశమవుతున్నారు. 14వ ఆర్థిక సంఘం సిఫార్సులు, కేంద్ర పథకాల నిధులు, వస్తు సేవల బిల్లుపై అభిప్రాయాల సేకరణ వంటి అంశాలు చర్చలో చోటు చేసుకునే అవకాశం ఉంది.