ముంబయి, ఫిబ్రవరి 4: ఆదర్శ్ కుంభకోణం కేసులో మహారాష్ట్ర మాజీ ముఖ్యమంత్రి అశోక్ చవాన్‌ను విచారించడానికి గవర్నర్ సిహెచ్ విద్యాసాగర్‌రావు సిబిఐకి అనుమతి ఇచ్చారు. చవాన్‌ను ప్రశ్నించే అంశంపై బిజెపి నాయత్వంలోని రాష్ట్ర ప్రభుత్వం గవర్నర్‌కు సిఫార్సు చేసింది. ‘మహారాష్ట్ర గవర్నర్ విద్యాసాగర్‌రావు గురువారం మాజీ సిఎం అశోక్ చవాన్‌ను విచారించడానికి సిబిఐకి అనుమతి ఇచ్చారు’ అని ఓ అధికార ప్రకటనలో తెలిపారు.

శ్రీనగర్, ఫిబ్రవరి 4: జమ్మూకాశ్మీర్‌లో రాజకీయ అనిశ్చితికి ఇప్పట్లో తెరపడే అవకాశాలు కనిపించకపోవడంతో రాష్ట్ర గవర్నర్ ఎన్.ఎన్.వోహ్రా గురువారం ఇద్దరు పదవీవిరమణ పొందిన ఐఎఎస్ అధికారులను తన సలహాదారులుగా నియమించుకున్నారు. రాష్ట్ర పాలనా వ్యవహారాలను నడపడంలో వీరిద్దరు గవర్నర్‌కు సహకరిస్తారు.

న్యూఢిల్లీ: ఆంధ్రప్రదేశ్ కొత్త రాజధాని అమరావతి నిర్మాణానికి పర్యావరణ అనుమతులపై రాష్ట్ర ప్రభుత్వానికి, కేంద్ర పర్యావరణ, అటవీ మంత్రిత్వ శాఖలకు జాతీయ గ్రీన్ ట్రైబ్యునల్ నోటీసులు జారీ చేసింది. తమ నోటీసులకు రెండు వారాలలోగా సమాధానం ఇవ్వాలని గ్రీన్ ట్రైబ్యునల్ ఆదేశించింది. ఈ పిటిషన్లపై తదుపరి విచారణను గ్రీన్ ట్రైబ్యునల్ మార్చి ఏడో తేదీకి వాయిదా వేసింది.

కోల్‌కత: ఓ మహిళ హత్య కేసులో నిందితులైన 11 మందికి మరణశిక్షను విధిస్తూ పశ్చిమబెంగాల్‌లోని నదియా జిల్లా కోర్టు గురువారం సంచలనాత్మక తీర్పును ఇచ్చింది. కృష్ణాగంజ్ ప్రాంతంలో 2014లో ఓ గృహిణి హత్యకు గురికాగా, 11 మందిని దోషులుగా పేర్కొంటూ పోలీసులు కేసు పెట్టారు. వీరందరూ ఉరిశిక్షకు అర్హులేనని కోర్టు అభిప్రాయపడింది.