విజయవాడ, నవంబర్ 3: ఆంధ్రప్రదేశ్‌కు ప్రత్యేక హోదా కల్పించాలని, విభజన హామీలు అమలు చేయాలని డిమాండ్ చేస్తూ ఈ నెల 16న ‘చలో అసెంబ్లీ’ కార్యక్రమం నిర్వహించాలని ఎపి ప్రత్యేక హోదా, విభజన హామీల సాధన సమితి నిర్ణయించినట్లు నాయకులు చలసాని శ్రీనివాస్, కె రామకృష్ణ తెలిపారు. గ్రామస్థాయి నుంచి జిల్లాస్థాయి వరకూ ప్రత్యేక హోదా వల్ల కలిగే ప్రయోజనాలను వారు వివరించారు.

తెనాలి, నవంబర్ 3: తుక్కు ఇనుము నుంచి విగ్రహాల తయారీలో అంతర్జాతీయ ఖ్యాతి గడించిన గుంటూరు జిల్లా తెనాలి శిల్పి కాటూరి రవిచంద్ర తయారు చేసిన మేకిన్ ఇండియా తరహా సింహాన్ని శుక్రవారం సింగపూర్ పంపటం కోసం తెనాలి నుండి తరలించారు. సింగపూర్‌లోని జ్ఞాని ఆర్ట్ గ్యాలరీ వారితో చేసుకున్న ఒప్పందం మేరకు గత సంవత్సరం ఆయన కొన్ని విగ్రహాలు తయారుచేసి ఇచ్చారు.

విశాఖపట్నం, నవంబర్ 3: నైరుతి బంగాళాఖాతంలో శ్రీలంకకు సమీపంలో అల్పపీడనం ఏర్పడినట్టు విశాఖ తుపాను హెచ్చరికల కేంద్రం అధికారులు శుక్రవారం రాత్రి తెలియజేశారు. దీని ప్రభావం వలన తమిళనాడులో విస్తారంగా వర్షాలు కురియనున్నాయి.
అలాగే, దక్షిణ కోస్తాలో కూడా ఒకటి, రెండు చోట్ల జల్లులు కురిసే అవకాశం ఉందని చెప్పారు. దక్షిణ కోస్తాలో గంటకు 45 నుంచి 50 కిలో మీటర్ల వేగంతో గాలులు వీస్తాయని తెలియచేశారు.

సింహాచలం, నవంబర్ 3: ప్రముఖ శ్రీవైష్ణవ క్షేత్రమైన సింహాచలం శ్రీ వరాహలక్ష్మీ నృసింహస్వామి వారికి భక్తులు కానుకల రూపంలో సమర్పిస్తున్న కోడెదూడల అవకతవకలపై త్రిసభ్య కమిటీ విచారణ ప్రారంభించింది. దేవస్థానానికి వస్తున్న కోడెదూడల వ్యవహరంలో అవకతవకలు జరుగుతున్నాయని ఇటీవల జంతు సంరక్షణ సంస్థలు కలెక్టర్‌కు ఫిర్యాదు చేసాయి.