అనంతపురం, జూలై 7: అసంఘటిత రంగంలో ఉన్న కార్మికుల్ని సంఘటితం చేసి వారి సమస్యల పరిష్కారం కోసం వ్యవసాయ కార్మిక సంఘం నిర్మాణానికి చర్యలు తీసుకుంటున్నట్లు ఐఎన్‌టియుసి జాతీయ అధ్యక్షుడు డాక్టర్ సంజీవరెడ్డి అన్నారు. అనంతపురంలో శుక్రవారం ఏర్పాటుచేసిన విలేఖరుల సమావేశంలో ఆయన మాట్లాడుతూ కూలీలు, కార్మికుల సంక్షేమానికి బలమైన ఉద్యమాన్ని నిర్మిస్తున్నామన్నారు.

విజయవాడ, జూలై 7: న్యాయవాదులు, న్యాయవాద గుమస్తాల సంక్షేమ నిధి స్టాంప్ ధరను రూ.50 నుంచి రూ.100కు పెంచటంతోపాటు న్యాయవాదులు, న్యాయవాద గుమాస్తాలకు ఇచ్చే పరిహారాన్ని రూ.3 లక్షల నుంచి రూ.10 లక్షలకు పెంచాలని సిఎం చంద్రబాబును శుక్రవారం వివిధ జిల్లాల బార్ అసోసియేషన్ల రాష్ట్ర ఫెడరేషన్ ప్రతినిధులు కోరారు.

సింహాచలం, జూలై 7: శ్రీ వరాహ నారసింహ అవతార కలయికతో కొలువైన సింహాచలేశుని సింహగిరి ప్రదక్షిణ వేడుకకు సర్వం సిద్ధమైంది. శనివారం జరిగే ఈ వేడుకకు దేశం నలుమూలల నుండి తరలివచ్చే భక్తులు సుమారు 32 కిలోమీటర్ల మేర వరాహనారసింహుడు కొలువైవున్న కొండ చుట్టూ ప్రదక్షిణ చేస్తారు. ప్రతి ఏటా ఆషాడ చతుర్థశి నాడు ఈ పవిత్రమైన సింహగిరి ప్రదక్షిణ నిర్వహించడం ఆనవాయితీ.

విజయవాడ, జూలై 7: వెలగపూడి సచివాలయం వద్ద రెండు కార్లలో మద్యం బాటిళ్ల వ్యవహారం శుక్రవారం కలకలం రేపింది. సచివాలయంలోకి వేళ్లేందుకు వచ్చిన రెండు కార్లను సచివాలయం గేట్-2 వద్ద భద్రతా సిబ్బంది తనిఖీ చేశారు. ఒక కారులో డిక్కీలో రెండు, మరో కారులో డిక్కీలో ఒక మద్యం బాటిలును గుర్తించారు. కారు డిక్కీల్లో మద్యం బాటిళ్లు లభించడంతో పోలీసులు అప్రమత్తమయ్యారు. సీరియస్‌గా తీసుకుని విచారణ ప్రారంభించారు.