పోలవరం, అక్టోబర్ 7: బహుళార్ద సాధక పోలవరం ప్రాజెక్టు త్రీడీ నమూనాను తయారుచేయనున్నారు. ఇందులో భాగంగా పూణె నుండి శాస్తవ్రేత్తలు శుక్రవారం ప్రాజెక్టు నిర్మాణ ప్రాంతాలను సందర్శించి, క్షుణ్ణంగా పరిశీలించారు. సెంట్రల్ వాటర్ పవర్ రీసెర్చి ఆధ్వర్యంలో శాస్తవ్రేత్తలు భాశేఖర్, మీనా జాక్ త్రిడి నమూనా తయారు చేసేందుకు క్షేత్రస్థాయి పరిశీలన నిమిత్తం వచ్చినట్టు ప్రాజెక్టు ఎస్‌ఇ విఎస్ రమేష్‌బాబు తెలిపారు.

శ్రీశైలం, అక్టోబర్ 6: శ్రీశైలం మహాక్షేత్రంలో దేవీ శరన్నవరాత్రులు అంగరంగవైభవంగా జరుగుతున్నాయి. ఉత్సవాల్లో భాగంగా గురువారం భ్రమరాంబ అమ్మవారు కాత్యాయినిగా భక్తులకు దర్శనమిచ్చారు. మల్లన్నస్వామి, అమ్మవార్లకు పూలపల్లకి సేవ నిర్వహించారు. ఉత్సవాల్లో భాగంగా అర్చక వేదపండితులు శాస్త్రోక్తంగా నిత్యం పూజాదికాలు నిర్వహిస్తున్నారు.

ఏలూరు, అక్టోబర్ 6 : రాష్ట్రంలో పోలీసు వ్యవస్థను పూర్తిస్థాయిలో ఆధునికీకరించడమే కాక, ప్రజలకు సేవే లక్ష్యంగా సిబ్బంది పనిచేసేలా సంస్కరణలు అమలుచేస్తున్నట్లు రాష్ట్ర డిజిపి ఎన్ సాంబశివరావు తెలిపారు. దీనిలో భాగంగా రాష్ట్రంలో త్వరలో మోడల్ పోలీస్‌స్టేషన్ల ఏర్పాటుతో పాటు డిజిటల్ వాచ్‌కు సన్నాహాలుచేస్తున్నామన్నారు. అలాగే మొబైల్ కంట్రోల్ రూం ఏర్పాటుపై ప్రధానంగా దృష్టి పెట్టామన్నారు.

కొల్లిపర, అక్టోబర్ 6: ప్రముఖ కాంగ్రెస్ నేత, రాజకీయ దురంధరుడు, నాలుగుసార్లు గుంటూరు జిల్లా దుగ్గిరాల నియోజకవర్గం నుండి ఎన్నికైన మాజీ శాసనసభ్యుడు గుదిబండి వెంకటరెడ్డి (74) గురువారం తెల్లవారుజామున తుదిశ్వాస విడిచారు. కొద్ది రోజులుగా తీవ్ర అస్వస్థతతో గుంటూరులోని ప్రైవేటు వైద్యశాలలో ఆయన చికిత్స పొందుతూ మృతి చెందారు. ప్రజల సందర్శనార్థం గుదిబండి పార్థివదేహాన్ని కొల్లిపరలోని స్వగృహంలో ఉంచారు.