అనంతపురం, జూలై 5: చంద్రన్న రంజాన్ తోఫా సరుకులు అందని వారు ఈనెల 15వ తేదీ వరకు తీసుకోవచ్చని పౌర సరఫరాలశాఖ మంత్రి పరిటాల సునీత తెలిపారు. ఈ మేరకు రాష్ట్రంలోని అన్ని జిల్లాల జాయింట్ కలెక్టర్లకు ఆదేశాలిచ్చామన్నారు. మంగళవారం అనంతపురం నగరంలో చౌకదుకాణాలను మంత్రి తనిఖీ చేశారు.

గుంటూరు, జూలై 5: మైనారిటీలకు తమ ప్రభుత్వం అండగా ఉంటుందని, వారి సంక్షేమానికి పెద్దపీట వేస్తుందని తెలుగుదేశం పార్టీ జాతీయ ప్రధాన కార్యదర్శి నారా లోకేష్ అన్నారు. గుంటూరు బ్రహ్మానందరెడ్డి స్టేడియంలో తూర్పు నియోజకవర్గ పార్టీ ఆధ్వర్యంలో మంగళవారం రాత్రి ఏర్పాటయిన ఇఫ్తార్ విందుకు లోకేష్ ముఖ్య అతిథిగా హాజరయ్యారు.

విశాఖపట్నం, జూలై 5: ప్రస్తుత ఆర్థిక సంవత్సరంలో రూ.1000 కోట్లతో ఎస్పీ కార్పొరేషన్ యాక్షన్ ప్లాన్ సిద్ధం చేశామని గిరిజన సంక్షేమ శాఖ మంత్రి రావెల కిషోర్‌బాబు అన్నారు. విశాఖలోని ఎస్సీ హాస్టల్‌ను మంగళవారం ఆకస్మికంగా సందర్శించిన ఆయన అనంతరం మీడియాతో మాట్లాడుతూ కొన్ని న్యాయ సంబంధమైన చిక్కుల కారణంగా యాక్షన్ ప్లాన్ అమల్లో జాప్యం చోటుచేసుకుందన్నారు.

హైదరాబాద్, జూలై 5: అమరావతి దేవాలయానికి చెందిన చెన్నైలో సదావర్తి భూములను మంత్రివర్గం, గవర్నర్‌కు తెలియకుండా దేవాదాయ శాఖ ఏకపక్షంగా ఎలా వేలం వేసి విక్రయిస్తుందని, ఈ వ్యవహారంపై దర్యాప్తు జరిపిస్తే అసలైన దోషులు బయటకు వస్తారని వైకాపా సీనియర్ నేత, మాజీ మంత్రి ధర్మాన ప్రసాదరావు డిమాండ్ చేశారు. ఈ భూముల వ్యవహారాన్ని ప్రధానమంత్రి నరేంద్రమోదీని కలిసి వివరించనున్నట్లు చెప్పారు.