నెల్లూరు: కోవూరు శివారు నందలకుంట వద్ద విజయవాడ నుంచి రేణిగుంటకు వెళ్తున్న వైట్ పెట్రోల్ ట్యాంకర్ మరో వాహనాన్ని ఓవర్‌టేక్ చేస్తూ బోల్తాపడింది. ఈ ప్రమాదంలో ట్యాంకర్ డ్రైవర్, క్లీనర్ స్వల్పంగా గాయపడ్డారు. ట్యాంకర్ నుంచి కారుతున్న పెట్రోల్‌ను క్యాన్లలో, బక్కెట్లలో తీసుకుపోయేందుకు సమీప గ్రామాల వారు భారీఎత్తున వచ్చారు.

తిరుమల: ఇక్కడి సమీపంలోని కుమారధార, పసుపుధార ప్రాజెక్టుల వద్ద శనివారం ఉదయం టాస్క్ఫోర్స్ పోలీసులు దాడులు చేసి పది లక్షల రూపాయల విలువచేసే ఎర్రచందనం దుంగలను స్వాధీనం చేసుకున్నారు. పోలీసుల రాకను గమనించి దొంగలు పరారయ్యారు. సంఘటన స్థలంలో కొన్ని ఆయుధాలు, రంపాలను కూడా పోలీసులు స్వాధీనం చేసుకున్నారు.

నెల్లూరు: బుచ్చిరెడ్డిపాలెం మండలం చెరువులోపల్లి అంగన్‌వాడీలో పనిచేస్తున్న మహిళా టీచర్, ఆమె భర్త, పిల్లలు ఆత్మహత్యకు ప్రయత్నించిన ఘటన శుక్రవారం జరిగింది. భర్త, ఏడేళ్ల కుమార్తె పరిస్థితి విషమంగా ఉండటంతో హుటాహుటిన ఆస్పత్రికి తరలించారు. కుటుంబ కలహాలే ఈ ఘటనకు కారణమని తెలిసింది.

విజయవాడ: ప్రభుత్వ ఎస్సీ,ఎస్టీ,బీసీ హాస్టళ్లలో వార్డెన్లు భారీగా నిధులు దుర్వినియోగం చేస్తున్నట్లు ఆరోపణలు రావడంతో ఎసిబి అధికారులు నందిగామలోని పలు హాస్టళ్లలో శుక్రవారం ఉదయం ఆకస్మికంగా రికార్డులను తనిఖీ చేశారు. హాస్టళ్లలో ఉంటున్న విద్యార్థుల సంఖ్య కంటే రిజిస్టర్లలో ఎక్కువగా సంఖ్యను చూపుతున్నట్లు, భోజనాలకు, ఇతర సౌకర్యాలకు భారీగా నిధులు ఖర్చు చేస్తున్నట్లు కనుగొన్నారు.