తిరుమల: దేశవ్యాప్తంగా ఉగ్రవాదుల కదలికలు ఉన్నాయన్న సమాచారం అందడంతో తిరుమలలో పోలీసులు గురువారం విస్తృతంగా తనిఖీలు నిర్వహించారు. రైల్వేస్టేషన్‌లో ఓ అనుమానిత వ్యక్తిని అరెస్టు చేశారు. కర్నాటకకు చెందిన పోలీసులు కూడా ఈ తనిఖీలో పాల్గొన్నారు. ఉగ్రవాదుల సానుభూతిపరుడిగా భావించి అరెస్టు చేసిన నిందితుడిని పోలీసులు ప్రశ్నిస్తున్నారు.

కర్నూలు: గడివేముల మండలం చిందుకూరులో నాలుగేళ్ల కుమార్తెకు విషమిచ్చి ఓ తల్లి ఆత్మహత్యకు యత్నించిన ఘటన గురువారం వెలుగు చూసింది. స్థానికులు గమనించి వెంటనే వారిని ఆస్పత్రిలో చేర్పించారు. ఇద్దరి పరిస్థితి విషమంగా ఉందని వైద్యులు తెలిపారు. ఈ ఘటనకు కుటుంబ కలహాలే కారణమని పోలీసులు చెప్పారు.

కడప: పులివెందుల నుంచి కర్ణాటక వెళ్తున్న ఆర్టీసీ బస్సులో గురువారం ఉదయం మంటలు చెలరేగాయి. కర్ణాటకలోని గౌనిపల్లి వద్దకు బస్సు రాగానే మంటలు వ్యాపించాయి. అయితే మంటలను వెంటనే ఆర్పివేయడంతో సుమారు 60 మంది ప్రయాణీకులు క్షేమంగా బయటపడ్డారు. సాంకేతిక లోపం కారణంగానే మంటలు చెలరేగాయని తెలిసింది.

విశాఖ: నక్కపల్లి మండలం వేంపాడు టోల్‌గేటు వద్ద బుధవారం రాత్రి తాము అదుపులోకి తీసుకున్న ఐదుగురూ విదేశీ పర్యాటకులేనని, ఉగ్రవాద సంస్థలతో వారికి ఎలాంటి సంబంధాలు లేవని విశాఖ రూరల్ జిల్లా ఎస్పీ ప్రవీణ్ గురువారం తెలిపారు. కారులో దిల్లీనుంచి బయల్దేరిన వీరు ఒడిశా మీదుగా విశాఖ జిల్లాకు చేరుకున్నారని, వీరి వద్ద పాస్‌పోర్టులు, వీసాలు సరైనవే ఉన్నాయని ఆయన స్పష్టం చేశారు.