నెల్లూరు: కోవూరు మండలం పెళ్లకూరు కాలనీలో కోతుల బెడద అధికం కావడంతో పల్లవి అనే పదకొండేళ్ల బాలిక రెండంతస్థుల భవనం పై నుంచి కిందికి దూకేసింది. బుధవారం ఉదయం జరిగిన ఈ సంఘటన స్థానికంగా సంచలనం సృష్టించింది. గాయపడిన బాలికను నెల్లూరు ఆస్పత్రికి తరలించారు. పలు గ్రామాల్లో కోతుల బెడద అధికంగా ఉందని స్థానికులు ఇదివరకే అధికారులకు ఫిర్యాదు చేశారు.

విశాఖ: దళిత మహిళ అయిన తనపై వ్యక్తిగతంగా అనుచిత వ్యాఖ్యలు చేసినందుకు వైకాపా ఎమ్మెల్యే, సినీనటి రోజాపై కోటి రూపాయల మేరకు పరువు నష్టం దావా వేసినట్లు పాయకరావుపేట టిడిపి ఎమ్మెల్యే వి.అనిత బుధవారం ఇక్కడ విలేకరులకు చెప్పారు. రోజా వ్యాఖ్యలు తనను, తన కుటుంబ సభ్యులను తీవ్ర మనస్తాపానికి గురి చేసాయని అన్నారు. రోజాచేత క్షమాపణ చెప్పించేదాకా తాను న్యాయ పోరాటం చేస్తానన్నారు.

అనంతపురం: జాతీయ గ్రామీణ ఉపాధి హామీ పథకం ప్రారంభమై దశాబ్దం పూర్తవుతున్న సందర్భంగా కాంగ్రెస్ ఉపాధ్యక్షుడు రాహుల్ గాంధీ ఫిబ్రవరి 2న అనంతపురం జిల్లాలో పర్యటిస్తారు. సరిగ్గా పదేళ్ల క్రితం ఈ జిల్లాలోని బండ్లపల్లిలో కాంగ్రెస్ అధినేత్రి సోనియా గాంధీ ఉపాధి హామీ పథకాన్ని ప్రారంభించారు. బండ్లపల్లిలో పర్యటించి రాహుల్ గాంధీ గ్రామస్థులతో మాట్లాడతారు.

విజయవాడ: కృష్ణా జిల్లాలోని గొల్లపాలెం నుంచి పశ్చిమగోదావరి జిల్లా పాతపాడుకు ఉప్పుటేరులో వెళ్తున్న పడవ మంగళవారం ఉదయం బోల్తా పడింది. అయితే ఈ ఘటనలో పడవలో ప్రయాణిస్తున్న మొత్తం 30 మంది క్షేమంగా ఒడ్డుకు చేరుకోవటంతో పెను ప్రమాదం తప్పింది. పాతపాడు చేపల మార్కెట్‌కు వెళ్లే ప్రయాణీకులను పరిమితికి మించి పడవలో ఎక్కించటం వల్లే ఈ ఘటన జరిగింది.