నెల్లూరు: నెల్లూరు జిల్లా దుత్తలూరు మండలంలో గురువారం ఉదయం మళ్లీ భూప్రకంపనలు చోటు చేసుకున్నాయి. బుధవారం సాయంత్రం కూడా స్వల్పంగా భూమి కంపించింది. గత కొద్దిరోజులుగా తరచూ భూప్రకంపనలు చోటు చేసుకుంటున్నందున జనం భయాందోళనకు లోనవుతున్నారు.

చిత్తూరు: సినీ నటుడు, ఎమ్మెల్యే నందమూరి బాలకృష్ణ గురువారం ఉదయం తన వియ్యంకుడు, ఎ.పి. సి.ఎం. చంద్రబాబు స్వగ్రామమైన నారావారి పల్లెలో జరిగిన భోగి పండుగ వేడుకల్లో పాల్గొన్నారు. కుటుంబ సభ్యులతో ఆయన భోగి మంట వద్దకు వచ్చి చలి కాచుకున్నారు. బాలకృష్ణతో ఫొటోలు దిగేందుకు గ్రామ ప్రజలు పోటీ పడ్డారు. అనంతరం ఆయన తిరుపతిలో ‘డిక్టేటర్’ సినిమా చూసేందుకు కుటుంబ సభ్యులతో కలిసి బయల్దేరారు.

తిరుపతి: ఎ.పి. సి.ఎం. చంద్రబాబు సతీమణి నారా భువనేశ్వరి బుధవారం ఉదయం తిరుమలలో స్వామివారిని దర్శించుకొన్నారు. ఎ.పి. ప్రభుత్వ చీఫ్ విప్ కాల్వ శ్రీనివాసులుతోపాటు పలువురు ప్రముఖులు స్వామి వారి సేవలో పాల్గొన్నారు. కాగా, సంక్రాంతి సెలవులు కావడంతో తిరుమలలో భక్తుల రద్దీ పెరిగింది.

చిత్తూరు: ఎర్రచందనం దొంగలు ఓ ఎస్సైపై దాడికి దిగిన సంఘటన బుధవారం ఉదయం చిత్తూరు జిల్లా ఏర్పేడు వద్ద జరిగింది. టాస్క్ఫోర్స్ పోలీసులు ఆకస్మిక తనిఖీలు నిర్వహిస్తుండగా ఎర్రచందనాన్ని తీసుకెళ్తున్న లారీ ఓ ఇంటిని ఢీకొని ఆగిపోయింది. దొంగలు అక్కడి నుంచి పరారయ్యేందుకు ప్రయత్నించగా స్థానికులు పట్టుకొని పోలీసులకు అప్పగించారు. ఈ క్రమంలో కొందరు దొంగలు ఎస్సైపై దాడిచేసి గాయపరిచారు.