ఇస్లామాబాద్, నవంబర్ 20: పాకిస్తాన్‌లోని సింథ్ రాష్ట్రంలో సోమవారం ఘోర రోడ్డు ప్రమాదం జరిగింది. ప్రయాణికుల వ్యాన్‌ను బొగ్గు లారీ ఢీకొన్న ప్రమాదంలో 20 మంది దుర్మరణం చెందారు. ఇటీవల ఓ రోడ్డు ప్రమాదంలో 27మంది చనిపోయిన ఘటన మరిచిపోకముందే మళ్లీ ఈ దారుణం చోటుచేసుకుంది. ఖైర్‌పూర్ ప్రాంతంలోని తెహ్రీ బైపాస్ వద్ద ఈ ప్రమాదం జరిగింది.

బీజింగ్, నవంబర్ 19: చైనా కొత్త రాయబారిగా గౌతమ్ బంబావాలే సోమవారం బాధ్యతలు స్వీకరించనున్నారు. గౌతమ్ ఇప్పటివరకు పాకిస్తాన్ హైకమిషనర్‌గా పనిచేశారు. అంతకుముందు భూటాన్ రాయబారిగా పనిచేసిన ఆయన 1984 బ్యాచ్‌కు చెందిన ఐఎఫ్‌ఎస్ అధికారి. చైనాలో భారత రాయబారిగా ఉన్న విజయ్ గోఖలే భారత విదేశాంగ శాఖలో ఆర్థిక వ్యవహారాల కార్యదర్శిగా నియమితులు కావడంతో ఆయన స్థానంలో గౌతమ్ బాధ్యతలు చేపట్టనున్నారు.

బీజింగ్, నవంబర్ 18: టిబెట్‌లోని నింగ్చీ నగరంతో పాటు సమీప ప్రాంతాల్లో శనివారం ఉదయం బలమైన భూకంపం సంభవించింది. దీని తీవ్రత రిక్టర్ స్కేల్‌పై 6.9గా నమోదైంది. భారత్‌లోని అరుణాచల్ ప్రదేశ్ సరిహద్దులో సంభవించిన ఈ భూకంపం ధాటికి ఆస్తినష్టం భారీగానే జరిగినట్లు ప్రాథమిక సమాచారం. ఈ విలయంలో ఎవరూ మరణించలేదని అధికార వర్గాలు తెలిపాయి. విద్యుత్ సరఫరాకు అంతరాయం కలగడంతో పాటు పెద్ద సంఖ్యలో భవనాలు నేలమట్టం అయ్యాయి.

బీజింగ్, నవంబర్ 18: చైనాలో జరిగిన అందాల పోటీలో భారతీయ యువతి మానుషి చిల్లార్ ‘మిస్ వరల్డ్’ కిరీటాన్ని దక్కించుకుంది. హర్యానాకు చెందిన ఇరవై ఏళ్ల వైద్య విద్యార్థిని మారుషి ఈ ప్రతిష్ఠాత్మక పోటీలో 108 మంది ప్రత్యర్థులను పక్కకునెట్టి ఈ ఘనతను సాధించింది. దీంతో 17 ఏళ్ల సుదీర్ఘ విరామం తర్వాత భారత్‌కు ఇపుడు ‘మిస్ వరల్డ్’ టైటిల్ దక్కినట్లయ్యింది.