మోగదీషు: సోమాలియా దేశాధ్యక్షుడి నివాసానికి సమీపంలో మంగళవారం కారు బాంబు పేలింది. దుండగుడు కారులో వచ్చి ఆత్మాహుతి దాడికి పాల్పడినట్లు పోలీసులువెల్లడించారు. అధ్యక్షుడు హసన్‌ షేక్‌ నివాసానికి ఎదురుగా ఉన్న రెండు హోటల్స్‌ దెబ్బతిన్నట్లు తెలిపారు. హోటల్‌ వద్ద అల్‌షబాబ్‌ గ్రూప్‌ మిలిటెంట్లు ఉన్నట్లు సమాచారం. పేలుడు తర్వాత తుపాకీ కాల్పులు కూడా వినిపించినట్లు పోలీసులు వెల్లడించారు.

నేను ఎవరికీ బెదిరిపోయి ఉద్యమం ఆపను... సీఎం చంద్రబాబును నిద్ర పోనివ్వను... కాపు ఉద్యమం వెనుక జగన్ ఉన్నాడని కొందరు చెబుతున్నారు... జగన్ వయసు నా అనుభవమంత లేదు.. ఆయన నా వెనుకలేరు- అని మాజీ మంత్రి ముద్రగడ తెలిపారు. మాజీ కేంద్ర మంత్రి దాసరి నారాయణరావు నివాసంలో మంగళవారం కాపు సంఘం నేతల భేటీ ముగిసింది.

ఏలూరు : ఉండిలో రొయ్యలచెరువులో మంగళవారం ఇనుప పడవకు కరెంట్‌షాక్ తగిలి ఇద్దరు కూలీలు అక్కడికక్కడే మృతి చెందారు. మృతులు ఉండి వాసులు లింగయ్య, సురేష్‌గా గుర్తించారు. రొయ్యలచెరువు యజమానులపై చర్యలు తీసుకోవాలని స్థానికులు డిమాండ్ చేస్తున్నారు.

కరీంనగర్: మావోల పేరుతో బెదిరించి నగదు వసూలు చేస్తున్న ముగ్గురు వ్యక్తులను పోలీసులు అరెస్ట్ చేసి, వారి నుంచి రూ.4 లక్షలు, 2 తుపాకులు, 1 కారును పోలీసులు స్వాధీనం చేసుకున్నారు. డబ్బులున్న వారిని బెదిరించి నగదు వసూలు చేస్తుండగా పికాస మాజీ సీఓ దాసరి శ్రీకాంత్, పిల్లి సంపత్, భూమేష్ అనే ముగ్గురు వ్యక్తులను అరెస్ట్ చేశామని తెలిపారు. వీరికి తుపాకులు ఎలా వచ్చాయనే కోణంలో పోలీసులు విచారిస్తున్నారు.