జపాన్ : రెండు రోజులుగా సంభవిస్తున్న వరుస భూ ప్రకంపనలతో జపాన్ చిగురుటాకులా వణుకుతోంది. తాజాగా శనివారం తెల్లవారుజామున మరోసారి పలు చోట్ల భూమి కంపించింది. రిక్టర్ స్కేల్‌పై దాని తీవ్రత 7.6గా నమోదైంది. రెండు రోజుల్లో దాదాపు 30 మంది మరణించగా వందలాది మంది క్షతగాత్రులయ్యారు. పలు ప్రాంతాల్లో ఇళ్లు కూలిపోగా, భారీ భవనాలు బీటలు వారాయి. రోడ్లపై పెద్ద పెద్ద గోతులు ఏర్పడ్డాయి.

విజయవాడ: మద్యం విషయమై ఇక్కడి సూర్యారావుపేట ప్రాంతంలో శనివారం ఇద్దరి మధ్య జరిగిన ఘర్షణలో ఓ నిండు ప్రాణం బలైంది. ఖమ్మం జిల్లాకు చెందిన మల్లికార్జున్ అనే వ్యక్తి తలపై మరో వ్యక్తి బండరాయితో మోదాడు. దీంతో మల్లికార్జున్ ప్రాణాలు కోల్పోయాడని పోలీసులు తెలిపారు.

హైదరాబాద్: ఆవేశంలో భర్తను కత్తితో పొడిచి చంపిన భార్య పోలీసులకు లొంగిపోయిన ఘటన నగరంలోని నల్లకుంట ప్రాంతంలో శుక్రవారం రాత్రి జరిగింది. గంగాధర్, విజయలక్ష్మి దంపతుల మధ్య కొంతకాలంగా విభేదాలున్నాయి. భర్త ప్రవర్తనతో విసిగిపోయినందునే కత్తితో ఆమె దాడి చేసిందని స్థానికులు చెబుతున్నారు.

మహబూబ్‌నగర్: నగదును దోచుకునేందుకు దొంగలు ఎస్‌బిహెచ్ ఎటిఎంను ధ్వంసం చేసిన సంఘటన పెబ్బేరులో శుక్రవారం అర్ధరాత్రి జరిగింది. ఎటిఎం యంత్రం తెరుచుకోనందున దొంగలు విధ్వంసం సృష్టించి పరారయ్యారు. స్థానికుల ఫిర్యాదుపై పోలీసులు ఎటిఎం కేంద్రాన్ని పరిశీలించి, దొంగల కోసం గాలిస్తున్నారు.