పరకాల, మే 25: పరకాల మాజీ ఎమ్మెల్యే బండారి శారారాణి అనారోగ్యంతో శనివారం సాయంత్రం హైదరాబాద్‌లోని తన నివాసంలో మృతి చెందారు. 2004లో పరకాల నుండి ఎమ్మెల్యేగా తెరాస నుండి పోటీ చేసి గెలుపొందారు. మాజీ ఎమ్మెల్యే శారారాణికి ఇద్దరు కుమారులు ఉన్నారు. మాజీ ఎమ్మెల్యే శారారాణి మృతి పట్ల పలువురు సంతాపం వ్యక్తం చేశారు.

రాజమహేంద్రవరం, మే 25: తాజా ముఖ్యమంత్రి, నాటి ప్రతిపక్షనేత వైఎస్ జగన్మోహన్‌రెడ్డిపై కోడి కత్తితో దాడి చేసిన జె శ్రీనివాసరావు శనివారం బెయిల్‌పై రాజమహేంద్రవరం సెంట్రల్‌జైలు నుంచి విడుదలయ్యాడు. ఏడు నెలల క్రితం పాదయాత్ర ముగించుకుని హైదరాబాద్ వెళుతున్న జగన్‌పై విశాఖపట్నం విమానాశ్రయంలో శ్రీనివాసరావు కోడి కత్తితో దాడి చేసిన సంగతి తెలిసిందే.

విశాఖపట్నం, మే 25: విశాఖలో సంచలనం రేకెత్తించిన కిడ్నీ రాకెట్ కేంద్రం శ్రద్ధ ఆసుపత్రిని అధికారులు శనివారం సీజ్ చేశారు. కిడ్నీ మార్పిడికి సంబంధించి ఇటీవల వెలుగు చూసిన కొన్ని సంఘటనలపై నమోదైన కేసుతో ఆసుపత్రిలో చోటుచేసుకున్న అవకతవకలపై యంత్రాంగం ముగ్గురు సభ్యుల కమిటీని నియమించింది.

సనా, మే 25: యెమెన్ మూడో నగరమైన తైజ్‌లో గత రాత్రి జరిగిన వైమానిక దాడుల్లో 9 మంది పౌరులు మృతి చెందినట్లు ఓ వైద్యుడు, స్వతంత్ర తిరుగుబాటు దారుడు శనివారం తెలిపారు. సౌదీ నేతృత్వంలోని సైనిక సంకీర్ణ బలగాలు జరిగిన ఈ దాడుల్లో ఇద్దరు చిన్నారులు కూడా మృతి చెందారని పేర్కొన్నారు. వీరితో పాటు అనేకమంది గాయ పడ్డారన్నారు.