దిల్లీ: హైదరాబాద్‌లోని యశోద ఆస్పత్రి యాజమాన్యానికి కేంద్ర వైద్యశాఖ బుధవారం నోటీసులు జారీ చేసింది. ఎంపీ ఎంఎ ఖాన్ ఇచ్చిన ఫిర్యాదుపై విచారణ జరపాలని రాజ్యసభ సచివాలయం సూచనల మేరకు వైద్యశాఖ నోటీసులిచ్చింది. తన భార్యకు యశోద ఆస్పత్రిలో సరైన చికిత్స జరగలేదని, అనవసరమైన టెస్టులన్నీ చేయించారని ఖాన్ తన ఫిర్యాదులో పేర్కొన్నారు.

దిల్లీ: ఎపికి ప్రత్యేక హోదా వస్తుందనుకుంటున్న వారి ఆశలపై కేంద్రం నీళ్లు చల్లింది. ప్రత్యేక హోదా ఇచ్చే ప్రసక్తే లేదని బుధవారం నాడు కేంద్ర ప్రభుత్వం అధికారికంగా ప్రకటించింది. ఈ విషయాన్ని కొద్దిరోజుల క్రితం కేంద్ర హోంశాఖ సహాయమంత్రి ప్రకటించగా, తాజాగా కేంద్ర ఆర్థికశాఖ సహాయమంత్రి సిన్హా ప్రభుత్వ వైఖరిని స్పష్టం చేశారు.

దిల్లీ: ఆర్థిక ఇబ్బందుల్లో ఉన్న ఎపికి కేంద్రం అదనపు నిధులు మంజూరు చేయాలని టిడిపి ఎంపీలు కోరారు. కేంద్రమంత్రి సుజనాచౌదరి నివాసంలో బుధవారం ఉదయం టిడిపి ఎంపీలు సమావేశమై ఈమేరకు ప్రధానికి విజ్ఞప్తి చేశారు. ఇప్పటికే కేంద్రం కొంతమేరకు నిధులిచ్చినా, ప్రస్తుత పరిస్థితులను పరిగణనలోకి తీసుకుని అదనంగా కేటాయింపులు చేయాలన్నారు. ఎపికి ప్రత్యేకహోదా వస్తుందన్న ఆశ ఇంకా తమకు ఉందని సుజనా అన్నారు.

కడప: అగస్టా కుంభకోణంలో ఓ నిందితుడితో దివంగత సిఎం వైఎస్ రాజశేఖరరెడ్డి అల్లుడు బ్రదర్ అనిల్‌కుమార్‌కు సంబంధాలున్నాయని టిడిపి ఎంపీ సిఎం రమేష్ బుధవారం ఇక్కడ మీడియాతో అన్నారు. ఈ విషయాన్ని 2012లోనే రాజ్యసభలో ప్రస్తావించినా అప్పటి యుపిఎ ప్రభుత్వం స్పందించలేదన్నారు. సిబిఐ చేత సమగ్ర విచారణ జరిపిస్తే అనిల్ ప్రమేయంపై వాస్తవాలు వెలుగుచూస్తాయన్నారు.