హైదరాబాద్: తెలుగురాష్ట్రాల ఉమ్మడి గవర్నర్ నరసింహన్‌ను తెలంగాణ సిఎం కెసిఆర్ మంగళవారం మధ్యాహ్నం ఇక్కడి రాజ్‌భవన్‌లో కలిశారు. కరవు పరిస్థితి, ప్రభుత్వం చేస్తున్న సహాయ చర్యలు, ఇరిగేషన్ ప్రాజెక్టులు, తాజా రాజకీయ పరిణామాలపై గవర్నర్‌కు సిఎం వివరించినట్లు తెలిసింది.

హైదరాబాద్: వేసవి సెలవుల్లో విద్యార్థినులకు క్రికెట్ నేర్పుతున్న నెపంతో ఓ కోచ్ లైంగిక వేధింపులకు పాల్పడుతున్నట్టు పోలీసులకు ఫిర్యాదు అందింది. చందానగర్‌లోని పిజెఆర్ స్టేడియంలో క్రికెట్ కోచ్ సలాంపై ఈ ఆరోపణలు రావడంతో విద్యార్థినుల తల్లిదండ్రులు పోలీసులకు ఫిర్యాదు చేశారు. దీంతో కోచ్ సలాంను మంగళవారం అదుపులోకి తీసుకుని పోలీసులు ప్రశ్నిస్తున్నారు.

నల్గొండ: పదో తరగతి ఫలితాలను నిలిపివేయడంతో సూర్యాపేటలోని శ్రీచైతన్య పాఠశాలపై మంగళవారం ఉదయం విద్యార్థులు, తల్లిదండ్రులు దాడి చేసి బీభత్సం సృష్టించారు. పాఠశాలలో ఫర్నిచర్‌ను ధ్వంసం చేశారు. ఈ పాఠశాలలో చదవడం వల్లనే తమ పిల్లల టెన్త్ ఫలితాలను నిలిపి వేశారని పేరెంట్స్ విరుచుకుపడ్డారు. సమాచారం తెలిసిన వెంటనే పోలీసులు పాఠశాలకు చేరుకుని పరిస్థితిని అదుపులోకి తెచ్చారు.

మహబూబ్‌నగర్: తెలంగాణలో ఇరిగేషన్ ప్రాజెక్టులను ఆపాలంటూ వైకాపా అధినేత జగన్ కర్నూలులో జలదీక్ష ప్రారంభించడంపై తెరాస కార్యకర్తలు తీవ్ర స్థాయిలో ఆగ్రహం వ్యక్తం చేశారు. ఇక్కడి వైకాపా కార్యాలయంలోకి మంగళవారం ఉదయం తెరాస కార్యకర్తలు చొరబడి ఫర్నిచర్‌ను ధ్వంసం చేశారు. కార్యాలయం బయట జగన్ దిష్టిబొమ్మను దగ్ధం చేశారు. తెలంగాణ ప్రాజెక్టులను అడ్డుకుంటే సహించేది లేదని వారు హెచ్చరించారు.