హైదరాబాద్: రాజోలిబండ ఎత్తిపోతల పథకం (ఆర్‌డిఎస్) పనులు ఆపివేయాలంటూ రాయచూరు కలెక్టర్‌కు కర్నూలు కలెక్టర్ రాసిన లేఖను ఉపసంహరించుకోవాలని తెలంగాణ ఇరిగేషన్ మంత్రి హరీష్‌రావు ఎపి నీటిపారుదల మంత్రి దేవినేని ఉమను కోరారు. ఆర్‌డిఎస్ పనులపై చర్చించేందుకు రావాల్సిందిగా ఆయన దేవినేనిని ఆహ్వానించారు. తమ సూచనలకు సానుకూలంగా స్పందించకుంటే ఎపికి అన్ని రకాల సహాయ సహకారాలను నిలిపివేస్తామని ఆయన హెచ్చరించారు.

ఆదిలాబాద్: చత్తీస్‌గఢ్‌లో సిఆర్‌పిఎఫ్ క్యాంపుపై సోమవారం రాత్రి మావోయిస్టులు జరిపిన దాడిలో ఆదిలాబాద్ జిల్లా బోధ్ మండలం మర్లపల్లికి చెందిన జవాను సతీష్ గౌడ్ మరణించాడు. ఈ క్యాంపులో 185 మంది జవాన్లు విధులు నిర్వహిస్తున్నారు. సతీష్ మృతదేహాన్ని చత్తీస్‌గఢ్ నుంచి ఆదిలాబాద్‌కు హెలికాప్టర్‌లో తరలించారు. ఆ తర్వాత రోడ్డు మార్గం ద్వారా మృతదేహాన్ని మర్లపల్లికి చేర్చారు.

హైదరాబాద్: వచ్చేనెల 2న జరిగే తెలంగాణ ఆవిర్భావ దినోత్సవాల్లో పాల్గొనాలంటూ సిఎం కెసిఆర్ గవర్నర్ నరసింహన్‌ను ఆహ్వానించారు. రాజ్‌భవన్‌లో గవర్నర్‌ను కలిసిన సందర్భంగా ఆయన ఆవిర్భావ దినోత్సవం నాడు చేపట్టే కార్యక్రమాలను వివరించారు.

మహబూబ్‌నగర్: కృష్ణా పుష్కరాల కోసం తెలంగాణలో పుష్కర ఘాట్ల నిర్మాణానికి 825 కోట్ల రూపాయలను విడుదల చేసినట్టు దేవాదాయ మంత్రి ఇంద్రకరణ్ రెడ్డి తెలిపారు. కర్నూలు చౌరస్తా నుంచి అలంపూర్ వరకూ నాలుగు లైన్ల రోడ్డు నిర్మాణానికి 85 కోట్లు ఖర్చు చేస్తామన్నారు. అలంపూర్ వద్ద సిఎం కెసిఆర్, గవర్నర్ నరసింహన్ పుష్కర స్నానాలకు వస్తారని తెలిపారు.