విజయవాడ, అక్టోబర్ 20: నూతన రాజధాని నవ్యాంధ్రప్రదేశ్ అభివృద్ధిలో ముందంజలో ఉండేందుకు రాష్ట్ర ప్రభుత్వం సన్నాహాలు చేస్తోంది. ఇందులో భాగంగా నాణ్యతతో కూడిన రోడ్ల నిర్మాణంపై ప్రభుత్వం దృష్టి పెట్టింది. 2019 నాటికి 1312 కి.మీ రోడ్లు నిర్మించాలని ప్రభుత్వం నిర్ణయించుకుంది. ఇప్పటికే ఉన్న సమస్యలు పరిష్కరించి రోడ్డు నిర్మాణ పనులు అధికారులు వేగవంతం చేశారు.

విశాఖపట్నం, అక్టోబర్ 20: ఆంధ్రప్రదేశ్ టేబుల్ టెన్నిస్ అకాడెమీ ఏర్పాటుకు ముఖ్యమంత్రి చంద్రబాబు నాయుడు గ్రీన్ సిగ్నల్ ఇచ్చారు. సౌత్ జోన్ ర్యాకింగ్ నేషనల్ టేబుల్ టెన్నిస్ చాంపియన్ షిప్ 2016 పోటీలను విశాఖలో గురువారం ఆయన ప్రారంభించారు. ఈ సందర్భంగా ఆయన మాట్లాడుతూ అంతర్జాతీయ ప్రమాణాలతో కొమ్మాదిలో రూపుదిద్దుకోనున్న క్రీడా ప్రాంగణంలో టిటి అకాడెమీకి స్థలం కేటాయించేందుకు అంగీకరించారు.

కదిరి, అక్టోబర్ 20: అనంతపురం జిల్లా నంబులపూలకుంటలో సోలార్ హబ్‌కు భూములు కోల్పోయి పరిహారం అందని రైతులను పరామర్శించడానికి గురువారం వచ్చిన సిపిఎం నాయకులను పోలీసులు అడ్డుకుని దౌర్జన్యం చేశారు. సిపిఎం పొలిట్ బ్యూరో సభ్యులు బి.వి రాఘవులు, జిల్లా నాయకులు సోలార్ ప్లాంట్‌ను పరిశీలించేందుకు వెళ్తుండగా పోలీసులు అడ్డుకున్నారు. దీంతో పోలీసులు, సిపిఎం నాయకుల మధ్య తోపులాట జరిగింది.

పాలకొల్లు, అక్టోబర్ 20: పశ్చిమ గోదావరి జిల్లా పాలకొల్లులోని పంచారామ క్షేత్రం క్షీరారామంలో మహా కుంభాభిషేకం మహాక్రతువు గురువారం వైభవంగా ప్రారంభమయ్యింది. రెండు రోజుల పాటు జరగనున్న ఈ కార్యక్రమాన్ని స్థానిక ఎమ్మెల్యే నిమ్మల రామానాయుడు కొబ్బరికాయ కొట్టి ప్రారంభించారు. తొలుత 33 మంది భక్తులు మాడ వీధుల్లో ఊరేగింపు నిర్వహించి, ఆలయ ప్రవేశం చేశారు. 11 మంది రుత్విక్కులు వీరిచే దీక్షాధారణ చేయించారు.