హైదరాబాద్, జనవరి 19: డిజిటల్ ఎకానమీ పుంజుకోవాలంటే దేశంలో అద్భుతమైన వౌలిక సదుపాయాలు కల్పించాలని, వచ్చే కేంద్ర బడ్జెట్ కీలకమైనదని సియాంట్ ఫౌండర్ చైర్మన్, నాస్కామ్ పూర్వ చైర్మన్ బివిఆర్ మోహన్ రెడ్డి అన్నారు. పెద్దనోట్ల రద్దు వల్ల డిజిటల్ ఎకానమీ వృద్ధి చెందుతుందన్నారు. ప్రభుత్వం, బ్యాంకులు, ఆర్థిక సంస్ధలు, చెల్లింపుల సంస్ధలు, కంపెనీలు సమిష్టి భాగస్వామ్యంతో పనిచేయాల్సి ఉందన్నారు.

విశాఖపట్నం, జనవరి 19: విశాఖలో ఐటి పరిశ్రమను అభివృద్ధి పరిచేందుకు అవసరమైన విమాన సర్వీసులను విస్తృతపర్చేందుకు ప్రతిపాదనలు పంపాలని ప్రభుత్వ ప్రధాన కార్యదర్శి ఎస్‌పి టక్కర్ కలెక్టర్ ప్రవీణ్‌కుమార్‌ను ఆదేశించారు. ఎయిర్ కనెక్టివిటీ పెంపొందించాల్సిన రూట్లపై ఎయిర్‌పోర్టు అథారిటీ అధికారులతో సంప్రదించి వెంటనే వారి నుండి ప్రతిపాదనలు పొంది తమకు పంపిస్తే తదుపరి చర్యలు చేపడతామన్నారు.

హైదరాబాద్, జనవరి 19: అంతర్జాతీయ ఆహార కంపెనీ డనోన్ సంస్ధ పౌష్టికాహార వ్యాపారాన్ని విస్తరించనున్నట్లు ప్రకటించింది. తమ బ్రాండ్ అప్టామిల్ 45 దేశాల్లో ప్రాచుర్యం పొందిందని, ప్రస్తుతం దేశంలో అన్ని ప్రాంతాలకు విస్తరించనున్నట్లు ఆ సంస్ధ ఎండి రొడ్రిగో లిమా తెలిపారు. తమ సంస్ధ దశాబ్ధాలుగా శిశువులకు అవసరమైన పౌష్టికాహారాన్ని సమకూర్చుతున్నట్లు తెలిపారు.

హైదరాబాద్, జనవరి 19: ఐటి నిపుణులు ఫణీశ్ మూర్తి సిగ్నిటీ టెక్నాలజీస్ నాన్ ఎగ్జిక్యూటివ్ డైరెక్టర్‌గా పదవీ బాధ్యతలు చేపట్టినట్లు ఆ సంస్ధ తెలిపింది. ఫణీశ్‌కు ఐటి రంగంలో 25 సంవత్సరాల అనుభవం ఉందని, ఫార్చూన్ 500 కంపెనీల్లో పనిచేసిన అపారమైన అనుభవం ఉందన్నారు. ఈ విషయాన్ని సిగ్నిటీ ఎండి సివి సుబ్రహ్మణియమ్ చెప్పారు.