భద్రాచలం టౌన్, ఏప్రిల్ 15: సీతారాముల కళ్యాణ మహోత్సవం అనంతరం భక్తులు ముత్యాల తలంబ్రాల కోసం నిరీక్షించారు. దేవస్థానం ఆధ్వర్యంలో పట్టణంలోని పలు కూడళ్లలో తలంబ్రాల కేంద్రాలు ఏర్పాటు చేసిన భక్తులకు పూర్తి సమాచారం లేకపోవడంతో వారికి కనపడిన కేంద్రం వద్దనే ఎగబడి మరీ తలంబ్రాల కోసం పాకులాడారు. ఈ క్రమంలో తానీషా కళ్యాణ మండపం వద్ద భక్తుల మధ్య తొక్కిసలాట చోటు చేసుకుంది.

ఎర్రుపాలెం, ఏప్రిల్ 15: జమలాపురం శ్రీ వెంకటేశ్వర స్వామివారి ఆలయంలో నవరాత్రోత్సవాల్లో భాగంగా చివరి రోజు శ్రీరామ నవమి సందర్భంగా సీతారామ చంద్రస్వామి వారి కల్యాణంను అత్యంత వైభవంగా నిర్వహించారు. ప్రత్యేకంగా ఏర్పాటు చేసిన వేదికపై శ్రీ సీతారాముల వారిని ఉంచి అర్చకులు కురవి సుబ్రహ్మణ్యశాస్ర్తీ, మార్తి రమణబాబుల ఆధ్వర్యంలో ఈ కాల్యాణాన్ని నిర్వహించారు.

భద్రాచలం, ఏప్రిల్ 15: జగదభిరాముడు...రఘుకుల సోముడు..శ్రీరామచంద్రుడు..కల్యాణరాముడుగా మారి...సౌందర్యరాశి...సుగుణాల సీతమ్మను అభిజిత్ లగ్నంలో పరిణయమాడాడు. నునుసిగ్గుల మొలకైన సీతమ్మకు నొసటన కల్యాణబొట్టు, బుగ్గన కాసింత దిష్టిచుక్కను పెట్టి..రాష్ట్ర ప్రభుత్వం, తిరుమల తిరుపతి దేవస్థానం నుంచి వచ్చిన పట్టు వస్త్రాలను అలంకరింప చేశారు. దీంతో అసలే సుగుణాల రాశి జనకుని కూతురు సీతమ్మ మరింత అందంగా కన్పించింది.

అచ్చంపేట, ఏప్రిల్ 15: మండలంలోని అన్ని గ్రామాల్లో దశరధ మహారాజు గారాల తనయుడు శ్రీరాముడు, జనక మహారాజు గారాలపట్టి సీతమ్మ తల్లి కళ్యాణ వేడుకలను ఘనంగా నిర్వహించుకున్నారు. అబిజిత్ లగ్నమందు జగదభిరాముడు, సీతమ్మతల్లి వివాహ వేడుకలు చలువ పందిళ్లలో వేడుకగా జరిగాయి. వివాహ వేడుకలను పురస్కరించుకుని రామాలయాలను సుందరంగా అలంకరించారు. నూతన వధూవరులైన సీతారామచంద్రమూర్తుల దర్శనంతో భక్తులు పులకించారు.