కీసర, మార్చి 21: కేంద్ర, రాష్ట్ర ప్రభుత్వాల ఆదేశాల మేరకు జిల్లాలోని ప్రజలందరూ ఈనెల 22 ఆదివారం జనతా కర్ఫ్యూను స్వచ్చందంగా పాటించాలని మేడ్చల్ కలెక్టర్ వాసం వెంకటేశ్వర్లు తెలిపారు.
శనివారం కలెక్టరేట్‌లోని తన చాంబర్‌లో జిల్లా అధికారులతో జనతా కర్ఫ్యూ, కోవిడ్-19 నియంత్రణపై సమీక్షా సమావేశం నిర్వహించారు.

జీడిమెట్ల, మార్చి 21: కుత్బుల్లాపూర్ నియోజకవర్గంలోని పలు పోలీస్‌స్టేషన్‌లలో కరోనా వైరస్‌పై పోలీసులు అవగాహన కార్యక్రమాన్ని నిర్వహించారు. నియోజకవర్గంలోని జీడిమెట్ల, జగద్గిరిగుట్ట, దుందిగల్, బాచుపల్లి పోలీస్‌స్టేషన్‌లలో ఆయా సీఐలు బాలరాజు, గంగారెడ్డి, వెంకటేశం, జగదీశ్వర్ ప్రత్యేకంగా మత పెద్దలతో, అసోసియేషన్ సభ్యులతో సమావేశం ఏర్పాటు చేసి కరోనా వైరస్ పై అవగాహన కల్పించారు.

ఖైరతాబాద్: పంజాగుట్ట పోలీస్‌స్టేషన్ పరిధిలోని ఓ స్టార్ హోటల్‌లో బస చేసిన విదేశీయులకు వైద్య బృందం శనివారం వైద్య పరీక్షలు నిర్వహించింది. ప్రపంచాన్ని కలవర పెడుతున్న కోవిడ్-19 విదేశీయుల్లోనే కనిపిస్తుండటంతో ప్రభుత్వ యంత్రాంగం అప్రమత్తం అయింది. రెండు నెలలుగా వివిధ దేశాల నుంచి ఇక్కడి వచ్చిన వారిని గుర్తించాలని ముఖ్యమంత్రి కేసీఆర్ ఆదేశించిన విషయం తెలిసిందే.

హైదరాబాద్: కోవిడ్ వైరస్ వ్యాప్తి చెందకుండా నగరంలో ప్రభుత్వం అన్ని రకాల చర్యలను తీసుకుంటుంది. ఈనెల 1వ తేదీ నుంచి 20వ తేదీ వరకు వివిధ దేశాల నుంచి సుమారు ఎనిమిది వేల మంది నగరానికొచ్చినట్లు అంచనాలు ఉన్నాయి. కానీ, ఈ సమాచారాన్ని ప్రభుత్వ శాఖలు ధ్రువీకరించకపోయినా, ఇప్పటి వరకు 1400 మంది విదేశీయుల ఇళ్లను పరిశీలించినట్లు, ఎక్కడా కూడా కరోనా ఆనవాళ్లు కన్పించలేదని జీహెచ్‌ఎంసీ ప్రకటించింది.