బాలీవుడ్‌లో బయోపిక్ హవా ఎక్కువ అవుతోంది. కొత్త కథలను వెతికే కంటే కొం దరు గొప్ప వ్యక్తుల జీవిత కథలను తెరకెక్కించే సన్నాహాలు చేస్తున్నారు. ఈ పద్ధతి ఇప్పుడు టాలీవుడ్‌కు వచ్చింది. తెలుగులో బయోపిక్ చిత్రాలు ఎక్కువగానే తెరకెక్కుతున్నాయి. ఎన్టీఆర్, మహానటి సావిత్రి, పుల్లెల గోపీచంద్ కథలు సినిమాలుగా వస్తున్నాయి.

మోహన్‌బాబు ప్రధాన పాత్రలో నటిస్తున్న చిత్రం ‘గాయత్రి’. మంచు విష్ణు, శ్రీయ జంటగా నటిస్తున్న ఈ చిత్రానికి సంబంధించిన పోస్టర్‌ను ఇటీవల విడుదల చేశారు. మాస్ యాక్షన్ ఎంటర్‌టైనర్‌గా సాగుతూ కుటుంబ కథా చిత్రంగా వుంటుందని దర్శకుడు మదన్ తెలియజేశారు. ఫిబ్రవరి 9న ఈ సినిమాను విడుదల చేయనున్నామని వారు తెలిపారు.

త్రినాథరావు నక్కిన దర్శకత్వంలో దిల్ రాజు నిర్మాణంలో నటుడు రామ్ ఓ చిత్రంలో నటించనున్నారు. ‘ఉన్నది ఒక్కటే జిందగీ’ సినిమా తరువాత ఆయన నటిస్తున్న చిత్రం ఇదే. ‘నేను లోకల్’ సినిమా తరువాత నక్కిన త్రినాథరావు చేస్తున్న సినిమా కూడా ఇదే. తాజా సమాచారం ప్రకారం ఈ చిత్రంలో రష్మిక కథానాయికగా నటించనున్నదట. ప్రస్తుతం ఆమె నిఖిల్‌తో ‘కిరాక్ పార్టీ’ చిత్రంతోపాటుగా విజయ్ దేవరకొండ, పరశురామ్‌ల చిత్రంలో నటిస్తోంది.

అటు సౌత్ ఇటు నార్త్‌లో గుర్తింపు తెచ్చుకున్న శృతిహాసన్ ఈమధ్య ప్రేమలో పడిందన్న వార్త మీడియాలో హల్‌చల్ చేస్తూనే వుంది. ఇప్పటికే వీరిద్దరి వ్యవహారంపై జోరుగా ప్రచారం కూడా జరుగుతోంది. శృతిహాసన్ మైఖేల్ కోర్సాల్ అనే లండన్ నటుడితో ప్రేమాయణం సాగిస్తోందంటూ వినిపిస్తున్న వార్తల సారాంశం. అతనితో పీకలోతు ప్రేమలో మునిగిపోయిందని, తన కుటుంబానికి కూడా అతన్ని పరిచయం చేసిందని అంటున్నారు.