దిల్లీ: బిజెపి జాతీయ అధ్యక్షుడు అమిత్ షా సమక్షంలో శుక్రవారం ఇక్కడ బిజెపి కోర్ కమిటీ సమావేశం జరిగింది. ఎపి బిజెపి అధ్యక్షుడు కంభంపాటి హరిబాబు, ఇతర నాయకులు పాల్గొన్నారు. ఎపిలో పార్టీ బలోపేతానికి చర్యలు, మిత్రపక్షమైన టిడిపితో సంబంధాలు తదితర విషయాలను చర్చించారు. భవిష్యత్ కార్యాచరణ గురించి పార్టీ నాయకులను అమిత్ షా మార్గనిర్దేశం చేశారు.

ముంబయి: ప్రధాని మోదీ క్యాబినెట్ విస్తరణలో తమకు అవకాశం లభించలేదని అలక వహించిన శివసేన నేతలను బిజెపి నాయకత్వం మరో రూపంలో మచ్చిక చేసుకుంది. మహారాష్ట్ర ముఖ్యమంత్రి దేవేంద్ర ఫడ్నవీస్ మంత్రివర్గంలో ఇద్దరు శివసేన ఎమ్మెల్యేలకు స్థానం కల్పించారు. ముఖ్యమంత్రి ఫడ్నవీస్ శుక్రవారం కొత్తగా 9 మందితో తన మంత్రివర్గాన్ని విస్తరించారు. రాష్ట్ర గవర్నర్‌ విద్యాసాగర్‌రావు కొత్త మంత్రులతో ప్రమాణం చేయించారు.

న్యూఢిల్లీ, జూలై 7: ఢిల్లీ, చెన్నైలలో హింసాకాండకు పాల్పడడం అలాగే తెలంగాణలో సమ్మెకు దిగిన అంశాల నేపథ్యంలో దేశంలో న్యాయవాద వృత్తికి సంబంధించిన అన్ని అంశాలను సమీక్షించాలని లా కమిషన్‌ను సుప్రీం కోర్టు కోరింది. న్యాయవాదుల వృత్తిపరమైన ప్రవర్తనకు సంబంధించిన అన్ని అంశాలను పరిగణలోకి తీసుకోవాలని స్పష్టం చేసింది.

హరిద్వార్/న్యూఢిల్లీ, జూలై 7: పవిత్ర గంగానది ప్రక్షాళనకు కేంద్ర ప్రభుత్వం బృహత్తర నమామీ గంగా పేరుతో గురువారం శ్రీకారం చుట్టింది. 1500 కోట్ల రూపాయల భారీ వ్యయంతో శుద్ది కర్మాగారాలు, ఘాట్‌లతో సహా మొత్తం 231 ప్రాజెక్టులను ఏడు రాష్ట్రాల్లో చేపడతారు. గంగా నదీ జలాలను శుద్ధి చేయడంతో పాటు దాని ప్రవాహానికీ ఎలాంటి అవరోధం లేకుండా చర్యలు చేపడతారు.