హైదరాబాద్, జూలై 31: వచ్చే ఎన్నికల్లో బిజెపి తెలంగాణలో అధికారంలోకి వస్తుందని, దానికి అనుగుణంగా గెలుపే లక్ష్యంగా రోడ్‌మ్యాప్ రూపొందించామని బిజెపి రాష్ట్ర అధ్యక్షుడు డాక్టర్ కె లక్ష్మణ్ తెలిపారు. ఆగస్టు చివరి నాటికి బూత్ స్థాయి కమిటీలు ఏర్పాటవుతాయని ఆయన చెప్పారు. ఇప్పటికే పల్లెపల్లెకు బిజెపి- ఇంటింటికీ మోదీ పేరుతో ఆరువేలమంది కార్యకర్తలు 23 వేల పోలింగ్ బూత్‌లలో పర్యటించారని తెలిపారు.

న్యూఢిల్లీ, జూలై 31: పేదల ఇళ్ల నిర్మాణానికి సికింద్రాబాద్ లాలాపేటలోని పదెకరాల రైల్వే స్థలాన్ని తెలంగాణ ప్రభుత్వానికి బదలాయించేలా చూడాలని కేంద్ర మంత్రి మంత్రి బండారు దత్తాత్రేయకును తెలంగాణ ఎక్సైజ్ శాఖ మంత్రి పద్మారావు విజ్ఞప్తి చేశారు. సోమవారంనాడు దత్తాత్రేయను ఆయన కార్యాలయంలో పద్మారావు కలిశారు.

హైదరాబాద్, జూలై 31: నామ మాత్రం కమీషన్‌తో రేషన్ డీలర్లు జీవనాన్ని కొనసాగించలేకపోతున్నారని, కమీషన్ పెంచి, ఆదుకోవాలని పౌరసరఫరాల శాఖ కమీషనర్ సివి ఆనంద్‌ను డీలర్లు కోరారు. కమీషన్ పెంచాలని కోరుతూ చేపట్టిన సమ్మెను పౌరసరఫరాల శాఖ మంత్రి ఈటల రాజేందర్, కమీషనర్ ఆనంద్‌పై నమ్మకంతో విరమిస్తున్నట్టు తెలంగాణ రేషన్ డీలర్ల సంక్షేమ సంఘం అధ్యక్షుడు బత్తుల రమేశ్‌బాబు తెలిపారు.

హైదరాబాద్, జూలై 31: రాష్ట్ర వ్యాప్తంగా అక్రిడేషన్ లేని జర్నలిస్టులకు ఆరోగ్య కార్డుల అందించేందుకు తెలంగాణ ప్రభుత్వం నిర్ణయించింది. అర్హులైన అక్రిడేషన్ లేని వివిధ పత్రికలు, చానెల్స్‌లో వివిధ హోదాల్లో పని చేస్తున్న వారంతా ఆగస్టు 16లోగా దరఖాస్తు చేసుకోవాలని సమాచార, పౌర సంబంధాల శాఖ కమిషనర్ ఒక ప్రకటనలో తెలిపారు.