న్యూఢిల్లీ, ఆగస్టు 3: ఆంధ్రప్రదేశ్‌కు ప్రత్యేక హోదా ఇవ్వటంతోపాటు రాష్ట్ర విభజన చట్టంలో ఇచ్చిన హామీల అమలు గురించి రాష్ట్ర ముఖ్యమంత్రి చంద్రబాబునాయుడు గురువారం సాయంత్రం ప్రధాని నరేంద్ర మోదీతో చర్చించనున్నారు. నరేంద్ర మోదీ మొదట తెలుగుదేశం ఎంపీలతో సమావేశమై ఆ తరువాత చంద్రబాబును కలుస్తారని అంటున్నారు.

హైదరాబాద్, ఆగస్టు 3: ఆంధ్రప్రదేశ్‌లో గ్రూప్ -2 సర్వీసులకు స్క్రీనింగ్ పరీక్ష నిర్వహించాలన్న పబ్లిక్ సర్వీసు కమిషన్ సిఫార్సులను ప్రభుత్వం ఆమోదించింది. 150 మార్కులకు స్క్రీనింగ్ పరీక్ష నిర్వహిస్తారు. అందుకు సంబంధించి సిలబస్‌ను సైతం ప్రభుత్వం ఆమోదించింది. గ్రూప్-2 అభ్యర్ధులకు ఆన్‌లైన్‌లోనే మెయిన్స్ పరీక్ష నిర్వహించాలని కూడా ప్రభుత్వం నిర్ణయించింది.

న్యూఢిల్లీ, ఆగస్టు 3: కేంద్రంలోని ఎన్‌డిఏ ప్రభుత్వం అమృత్ పథకం కింద రెండు తెలుగు రాష్ట్రాలకు 1,432 కోట్ల పెట్టుబడులకు అనుమతి మంజూరు చేసింది. ఆంధ్రప్రదేశ్‌కు 877 కోట్లు, తెలంగాణాకు 555 కోట్ల రూపాయలు పెట్టుబడులకు అనుమతి లభించింది. ఆంధ్రప్రదేశ్‌కు కేటాయించిన 877 కోట్ల పెట్టుబడుల్లో కేంద్ర సహాయం 352 కోట్లు.

హైదరాబాద్, ఆగస్టు 3: భవన నిర్మాణ రంగంలో నాణ్యత, ప్రమాదాలు జరగకుండా పాటించాల్సిన భద్రతపరమైన అంశాలపై సైటు ఇంజనీర్లకు, సూపర్‌వైజర్లకు తగిన శిక్షణనివ్వనున్నట్లు కమిషనర్ జనార్దన్‌రెడ్డి వెల్లడించారు. ఈ మేరకు బుధవారం ఆయన నేతృత్వంలో జరిగిన సమావేశం ఈ నిర్ణయం తీసుకున్నట్లు కమిషనర్ వెల్లడించారు. కార్పొరేట్ సోషల్ రెస్పాన్సిబిలిటీ కింద ఈ కార్యక్రమాల్ని నిర్వహించాలని నిర్ణయించినట్లు ఆయన వివరించారు.