బీహార్ : వైశాలి జిల్లా రమాంత్‌పూర్‌లోని రామాలయంలో సీతారాముల విగ్రహాలతో పాటు లక్ష్మణుడు, ఆంజనేయస్వామి విగ్రహాలు చోరీకి గురయ్యాయి. అష్ణ్ధాతులతో తయారైన ఈ విగ్రహాల ఎంతో విలువైనవని స్థానికులు చెబుతున్నారు. గతంలో మహావీర, బౌద్ధ విగ్రహాలను చోరీ చేసిన అంతరాష్ట్ర ముఠానే ఈ విగ్రహాలను చోరీ చేసినట్లు భావిస్తున్నారు.

చెన్నై: భారీ వర్షాల తాకిడి నుంచి ఇప్పుడిప్పుడు కోలుకుంటున్న తమిళనాడులో మళ్లీ వర్షాలు కురిసే అవకాశం ఉందని వాతావరణ శాఖ ప్రకటించింది. శనివారం నుంచి మూడు రోజులపాటు రామనాథపురం, తిరునల్వేలి, టుటికొరిన్, కన్యాకుమారి జిల్లాల్లో మోస్తరు లేదా భారీ వర్షాలు కురిసే అవకాశం ఉంది. ఐతే చెన్నైలో మాత్రం వాతావరణం పొడిగా ఉంటుందని అంచనా వేశారు.

చండీగఢ్: పంజాబ్‌లోని పఠాన్‌కోట్ ఎయిర్ బేస్‌లో శనివారం తెల్లవారుజామున చొరబడేందుకు కొందరు ఉగ్రవాదులు ప్రయత్నించగా, భారత సైనికులు ఆ ప్రయత్నాన్ని తిప్పికొట్టారు. ఇరు వర్గాల మధ్య జరిగిన ఎదురుకాల్పుల్లో నలుగురు ఉగ్రవాదులు, ఇద్దరు సైనికులు మరణించారు. వైమానిక స్థావరాన్ని ధ్వంసం చేసేందుకు తాము ఈ దాడికి పాల్పడినట్లు ‘జైష్-ఎ-మహమ్మద్’ అనే ఉగ్రవాద సంస్థ ప్రకటించింది.

న్యూఢిల్లీ, జనవరి 1: వంటగ్యాస్ వినియోగదారులకు సబ్సిడీని వారి బ్యాంకు ఖాతాల్లో జమ చేసే పద్ధతిని విజయవంతంగా అమలు చేసిన కేంద్రం ఏప్రిల్ ఒకటో తేదీ నుంచి అదే పద్ధతిని కిరోసిన్ వినియోగదారులకు అమలు చేయనుంది. అంటే ఏప్రిల్ ఒకటి నుంచి కిరోసిన్ వినియోగదారులు కూడా మార్కెట్ ధరపై కిరోసిన్‌ను కొనాల్సి ఉంటుంది. వారు పొందాల్సిన సబ్సిడీ మొత్తాన్ని ప్రభుత్వం తరువాత వారి బ్యాంకు ఖాతాల్లో జమ చేస్తుంది.