హైదరాబాద్: పట్టపగలు నడిరోడ్డుపై ఓ మహిళ నుంచి ఏడు లక్షల రూపాయల నగదు, నగలను ఆగంతకులు దోచుకున్న ఘటన నేరేడ్‌మెట్ గోకుల్‌నగర్‌లో శుక్రవారం జరిగింది. హెచ్‌డిఎఫ్‌సి బ్యాంకు లాకర్ నుంచి నగదు, నగలు తీసుకుని వస్తుండగా దుండగులు వెంబడించి ఆమె హ్యాండ్‌బ్యాగును లాక్కుని పరారయ్యారు. బాధితురాలు ఫిర్యాదు చేయడంతో పోలీసులు ఆగంతకుల కోసం ఆరా తీస్తున్నారు.

హైదరాబాద్: తెలంగాణ ఆర్టీసీలో లాభనష్టాలు, తాజా స్థితిగతులపై సిఎం కెసిఆర్ ఉన్నతాధికారులతో శుక్రవారం సమీక్ష జరిపారు. నగరంలోని ఓ హోటల్‌లో జరిగిన సమావేశంలో రవాణామంత్రి మహేందర్‌రెడ్డి, ఆర్టీసీ ఎండి రమణారావు, రవాణాశాఖ అధికారులు పాల్గొన్నారు. నష్టాలను అధిగమించలేకుంటే ఆర్టీసీని మూసి వేయడం ఉత్తమమని సిఎం వ్యాఖ్యానించిన సంగతి తెలిసిందే.

హైదరాబాద్: ఖైరతాబాద్‌లో మహాగణపతి విగ్రహ ప్రతిష్ఠాపనకు శుక్రవారం ఉదయం శాస్త్రోక్తంగా భూమిపూజ జరిగింది. బిజెపి ఎమ్మెల్యే చింతల రామచంద్రారెడ్డి కొబ్బరికాయ కొట్టి ఈ కార్యక్రమాన్ని లాంఛనంగా ప్రారంభించారు. కాగా, ఖైరతాబాద్‌లో విగ్రహం ఎత్తును తగ్గించాలని పోలీసులు ఒత్తిడి తేవడాన్ని తాము సహించేది లేదని భాగ్యనగర గణేష్ ఉత్సవ కమిటీ హెచ్చరించింది.

హైదరాబాద్: స్కూల్ ఆవరణలో బస్సును రివర్స్ చేస్తుండగా దాని కింద ప్రమాదవశాత్తూ పడి నాలుగేళ్ల విద్యార్థి మరణించాడు. ఈ విషాదం చింతల్ వద్ద వివేకానందనగర్‌లో శుక్రవారం ఉదయం చోటుచేసుకుంది. ఓ ప్రైవేటు స్కూల్ బస్‌ను రివర్స్ చేస్తుండగా ఎల్‌కెజి విద్యార్థి జశ్వంత్ రెడ్డి దాని కింద పడి అక్కడికక్కడే ప్రాణాలు కోల్పోయాడు. ఈ ఘటనపై విద్యార్థుల తల్లిదండ్రులు ఆందోళన వ్యక్తం చేశారు.