హైదరాబాద్: మైనార్టీలు, గిరిజనులకు రిజర్వేషన్ల విషయమై ఇచ్చిన హామీలను అమలు చేసేలా తెలంగాణ సర్కారుపై ఒత్తిడి తెస్తామని టిడిపి యువనేత నారా లోకేష్ తెలిపారు. ఇక్కడ శనివారం పార్టీ నేతలతో జరిగిన సమావేశంలో తాజా రాజకీయ పరిణామాలను ఆయన సమీక్షించారు. అన్ని నియోజకవర్గాలకూ పార్టీ ఇన్‌చార్జిలను నియమించాలని, హైదరాబాద్, వరంగల్‌లో కార్యకర్తలకు శిక్షణ తరగతులు నిర్వహించాలని సమావేశంలో నిర్ణయించారు.

హైదరాబాద్: వ్యక్తిగత స్వార్థంతో కొంతమంది నాయకులు ఫిరాయింపులకు పాల్పడుతున్నా పార్టీ కార్యకర్తలు నిరాశపడరాదని తెలంగాణ పిసిసి అధ్యక్షుడు ఉత్తమ్‌కుమార్ రెడ్డి అన్నారు. కరీంనగర్ జిల్లా పెద్దపల్లి నుంచి వచ్చిన కాంగ్రెస్ నేతలు, కార్యకర్తలు శనివారం తనను కలిసిన సందర్భంగా ఆయన మాట్లాడారు. 2019 ఎన్నికల్లో కాంగ్రెస్‌కు అధికారం ఖాయమని, అంతవరకూ కార్యకర్తలు సైనికుల్లా పనిచేయాలన్నారు.

హైదరాబాద్: బంజారాహిల్స్‌లో ఉంటున్న సినీ నటి విజయశాంతి ఇంట్లో బంగారు నగలు కాజేసింది పనిమనిషేనని పోలీసుల విచారణలో తేలింది. విజయశాంతి ఇంట్లో గాజులు, వజ్రాలు పొదిగిన చెవిదుద్దులు, ఉంగరం అయిదురోజుల క్రితం మాయమయ్యాయి. ఈ విషయమై విజయశాంతి ఫిర్యాదు మేరకు బంజారాహిల్స్ పోలీసులు విచారణ చేపట్టి ‘ఇంటిదొంగ’ను కనిపెట్టారు.

హైదరాబాద్: సింగూరు వరకూ కొమురెల్లి మల్లన్నసాగర్ జలాశయం నీటిని తరలించేందుకు నివేదికను సిద్ధం చేయాలని తెలంగాణ సర్కారు శనివారం అధికారులను ఆదేశించింది. మల్లన్నసాగర్ జలాశయాన్ని నిర్మించాలని తెలంగాణలోని పలు జిల్లాల్లో రైతులు, తెరాస కార్యకర్తలు ఆందోళనలు చేయడంతో ప్రభుత్వం ఈ చర్య తీసుకుంది.