ఈ మధ్య వేసవిలో ఎండలు దంచికొట్టాయి. చైనాలోనూ సూర్యుడి ప్రతాపం ఎక్కువగానే ఉంది. దీంతో అక్కడి వాటర్ పార్కులు వివిధ వినూత్న కార్యక్రమాలు నిర్వహించి సందర్శకులను ఆహ్వానించాయి. వూహెన్‌లోని ఓ వాటర్ పార్కులోని కొలనుల్లో ఇలా బంతులు నింపేశారు. వాటివల్ల ఎండ నేరుగా నీటిని తాకదన్నమాట. దీనితో నీళ్లు చల్లగా ఉంటాయి. పైగా చూడటానికి చక్కగాను, ఆడుకోడానికి వీలుగాను ఉందికదూ ఈ బంతుల కొలను.

బ్రెజిల్‌లో అవినీతి పెచ్చుమీరిపోయింది. సాక్షాత్తు ఆ దేశ అధ్యక్షుడిపైనే అవినీతి ఆరోపణలు వెల్లువెత్తాయి. అధికార పీఠంపై ఉన్న నాయకులు వైదొలగాలన్న ఆందోళనలు ఊపందుకున్నాయి. అందులో భాగమే ఈ మాస్క్‌లతో నిరసన. అవినీతి నాయకులను గద్దెదించాలని బ్రెజిల్‌లో ఆందోళనకారులు ఇలా మాస్క్‌లు ధరించి ప్రదర్శనలు నిర్వహిస్తున్నారు.

స్కాట్‌లాండ్‌లో ప్రఖ్యాత శిల్పి ఆండీ స్కాట్ రూపొందించిన ఈ జోడు గుర్రాలను ‘ది కెల్పీస్’ అని పిలుస్తారు. 100 అడుగుల ఎత్తుతో, ఒక్కోటి 300 టన్నుల ఇనుముతో రూపొందించారు. హెలిక్స్‌లోని కేరన్ నదికి సంబంధించిన ఫోర్త్ అండ్ క్లైడ్ కాలువలపై వీటిని నిర్మించారు. ఈ కాలువలు చుట్టుపక్కల ఉన్న 16 ప్రాంతాలను కలుపుతూంటాయి. ఈ జోడుగుర్రాల శిల్పాలు కాలువలపై ఉంటాయి.

సాధారణంగా ఏ కోతైనా, ఎంత పెద్దదైనా పది కిలోల బరువుకు మించదు. కానీ ఇక్కడ కనిపిస్తున్న ఈ కోతి రెండేళ్ల వయసులోనే పది కిలోల బరువుదాటేసింది. ప్రస్తుతం దాని బరువు 15 కిలోల పైమాటే. థాయ్‌లాండ్‌లోని బ్యాంకాక్ కాలువల మార్కెట్‌లో ఇది తిరుగుతోంది. అక్కడికి వచ్చే పర్యాటకులు ఇచ్చే తినుబండారాలు తినీతిని ఇలా తయారైందన్నమాట. ఇక లాభం లేదనుకున్న అటవీ, పర్యాటక శాఖ అధికారులు దానిని ఓ ప్రత్యేక శిబిరానికి తరలించారు.